שוידערליכע קאמערע בילדער פון טיילאנד צייגט וויאזוי א 'פלעש פלאד' פארפלייצט א גאס אין בלויז עטליכע סעקונדעס

א שוידערליכע CCTV ווידעא וואס קומט ארויס פון טיילאנד צייגט ווי שנעל א פלעש פלאד קען זיך פארוואנדלען אין א טויטליכע קאטאסטראפע, ווען אין בלויז עטליכע סעקונדעס ווערט א רואיגע וואוין-געגנט גאס אינגאנצן פארשוואונדן אונטער א מאסיווע כוואליע פון בלאטיגע וואסער.

די ווידעא כאפט אויף וויאזוי דער שטראם יאגט אראפ די גאס, שלעפנדיג מיט זיך אלעס וואס קומט אין וועג און קראכט אריין אין די ארומיגע געביידעס מיט אזא קראפט אז מען קען זען ווי עס ברענגט אראפ א גאנצע וואנט. איינוואוינער וואס זענען געכאפט געווארן אין די ווידעא האבן קוים געהאט צייט צו רעאגירן בעפאר דאס וואסער האט איינגעשלינגען די גאנצע גאס, וואס דינט אלס א שרעקליכע דערמאנונג ווי ווייניג צייט מענטשן האבן זיך צו ראטעווען בעפאר די קאטאסטראפע שלאגט צו. די קליפ פארשפרייט זיך יעצט זייער שנעל אויפן אינטערנעט, אין די צייט וואס פאמיליעס איבער'ן גאנצן לאנד שילדערן ענליכע שרעקעדיגע איבערלעבענישן ווי זיי האבן געזוכט אן אנטלויף צו זיכערהייט.

די בילדער קומען אין א צייט וואס טיילאנד גייט אדורך א ברוטאלע תקופה פון פארפלייצונגען וואס פלאגן דאס לאנד שוין זינט האלב סעפטעמבער. די שטעט באנגקאק, טשאנבורי און רייאנג זענען צווישן די מערסט-געטראפענע געגנטער נאך טעג פון אומאויפהערליכע, שווערע רעגנס.

דער גאווערנאר פון באנגקאק האט דערקלערט אלע 50 דיסטריקטן פון די הויפטשטאט אלס א קאטאסטראפע זאנע, נאכדעם וואס ארום 300 מילימעטער רעגן איז געפאלן אין בלויז 48 שעה, וואס האט אינגאנצן איבערגעפילט די גאסן, קאנאלן און דרעינאדזש סיסטעמען וואס זענען קיינמאל נישט געבויט געווארן צו קענען הענדלען אזא מאסיווע פארנעם פון וואסער.

אין רייאנג האבן באאמטע פארארדנט עמערדזשענסי עוואקואציעס צוליב די שרעק אז א לאקאלע רעזערוואר קען צוזאמפאלן, אינדערצייט וואס די אויטאריטעטן אין צענדליגע פראווינצן האלטן אין איין ארויסגעבן ווארענונגען איבער פרישע פלעש פלאדס, ערד-גליטשן און טייכן וואס שוועמלען איבער.

די שרעקליכע סצענעס דעקן אויף ערנסטע לעכער אין טיילאנד'ס שטאטישע דרעינאדזש אינפראסטרוקטור, און ברענגט ארויף שווערע פראגעס איבער וויפיל די שטעט אינעם לאנד זענען באמת צוגעגרייט פאר אזעלכע שווערע און מאסיווע רעגנס וואס ווערן אלס מער אפט.