סעקרעטערי אוו סטעיט מארקא רוביא מיט א שארפע ווארענונג: "די איראנער עקאנאמיע האלט ביים אונטערגיין צו א היסטארישע שטאפל פון ארימקייט"

אמעריקאנער סעקרעטערי אוו סטעיט מארקא רוביא האט מיטוואך ארויסגעגעבן א שארפע ווארענונג איבער דעם פארערגערטן קריזיס וואס פלאגט איראן, זאגנדיג אז דאס לאנד'ס עקאנאמיע האלט שוין ביי א שטאפל פון ארימקייט און נויט וואס גאר ווייניג לענדער אויף די וועלט האבן אמאל איבערגעלעבט.

רעדנדיג צו רעפארטערס בעת א באזוך אין אטען, גריכנלאנד, האט דער סעקרעטערי אוו סטעיט ארויפגעלייגט די פולע שולד אויף די ראדיקאלע שיאיטישע פירער וועלכע קאנטראלירן דאס לאנד. ער האט קלארגעשטעלט אז זיי זענען די איינציגסטע וואס האבן אריינגעפירט דאס לאנד אין דעם טיפן זומפ, און האבן אריינגעווארפן די פשוט'ע און ארימע בירגער אין א טראגישן און פארצווייפלטן מצב. רוביא האט אנגעוויזן אז אנשטאט צו נוצן די געלטער לטובת די לאקאלע איינוואוינער, ווערן די רעסורסן גענוצט צו פינאנצירן טעראר גרופעס ווי חאמאס און חיזבאללא.

אין די זעלבע צייט האט רוביא אנטפלעקט אז איראן האט אינגאנצן פארלוירן קאנטראל אויפן 'סטרעיט אוו הארמוז' (Strait of Hormuz), און אז דער אויל פלוס דורכ'ן וואסער-וועג האט זיך שוין מערסטנס ערהוילט.

רוביא האט אונטערגעשטראכן אז דער שווערער עקאנאמישער דרוק קומט אלס א דירעקטע רעזולטאט פון די שווערע אמעריקאנער סאנקציעס וואס טוען יעצט אפקאסטן א טייערן פרייז פארן רעזשים. "די פשוט'ע איראנער בירגער, וואס האבן סייווי נישט קיין ווארט אין די רעגירונג, זענען די וואס ליידן די מערסטע פון די איזאלאציע און שלעכטע פירערשאפט," האט רוביא געזאגט, ארויסברענגענדיג די לאנגיעריגע אמעריקאנער שטעלונג אז דער רעזשים לייגט א גרעסערע געוויכט אויף זייערע טעראר פראקסיס ווי אויף די געברויכן פון זייערע אייגענע בירגער.

זיינע ווערטער קומען אין א צייט וואס עס קומען פאר אנגעצויגענע געשפרעכן איבער איראן'ס נוקלעארע אמביציעס און די ווייטערדיגע אמעריקאנער סאנקציעס פאליסיס. די ווארענונג צייגט א קלארע בילד פון אן עקאנאמיע וואס האלט ביים צוזאמפאלן אונטער א שווערן קריזיס, און א פירערשאפט וואס רוביא האלט פולשטענדיג פאראנטווארטליך פאר די ליידן פון אירע אייגענע מענטשן.