דזשעראד קושנער און סטיוו וויטקאף, טראמפ'ס שליחים, מעלדן איבער פארשריט אין די רוסלאנד-אוקריינע פארהאנדלונגען אין אבו דאבי

דזשעראד קושנער און סטיוו וויטקאף, די ספעציעלע שליחים פון פרעזידענט דאנאלד טראמפ, האבן איבערגעגעבן א באריכט פאר רעפארטער אין אבו דאבי נאך צוויי טעג פון פארהאנדלונגען צווישן רוסלאנד און אוקריינע, וואס זענען געווארן פארמיטלט דורך די פאראייניגטע שטאטן. דאס איז געווען די ערשטע פנים-אל-פנים רונדע פון געשפרעכן צווישן די דריי זייטן אין ארום ניין מאנאטן, נאכדעם וואס די פארהאנדלונגען זענען געווארן אפגעשטעלט זינט פארגאנגענעם פעברואר.

קושנער האט ארויסגעברענגט אז דער ציל איז פיל מער ווי בלויז צו ענדיגן די יעצטיגע מלחמה אין אוקריינע, נאר ער וויל אויספארעמען א וועג וויאזוי אויסצומיידן מלחמות פאר די קומענדיגע הונדערט יאר. וויטקאף האט צוגעגעבן אז די אמעריקאנער טיעם שפירט אן עכטע "מאמענטום" און א פאזיטיווע רוח, בעת קושנער האט אנגערופן די געשפרעכן אלס א "גוטע ערשטע שריט".

אבער די בילד פון אינעווייניג אין די פארהאנדלונגס-צימער איז עטוואס מער געמישט ווי די אפטימיזם וואס די אמעריקאנער האבן ארויסגעשטעלט. דער הויפט רוסישער פארהאנדלער, וולאדימיר מעדינסקי, האט געזאגט אז ביידע זייטן האבן זיך טאקע פארשטאנען אויף געוויסע אישוס, אבער אויף אנדערע זאכן זענען זיי נאך ווייט פון אן עמק השווה, און עס וועלן נאכפאלגן פרישע געשפרעכן. די איינציגסטע קאנקריטע רעזולטאט וואס איז דערווייל ארויסגעקומען פון די מיטינגען איז אן אגרימענט אויף א ברייט-פארמאסטע ארעסטאנטן אויסטויש.

די צוויי אמעריקאנער שליחים, קושנער און וויטקאף, זענען יעצט ערווארטעט צו פארן קיין מאסקווע זיך צו טרעפן דעם דאנערשטאג מיט'ן רוסישן פרעזידענט וולאדימיר פוטין, און דערנאך וועלן זיי אפרייזן קיין דובלין זיך צו טרעפן מיט'ן אוקריינישן פרעזידענט וולאדימיר זעלענסקי. קושנער האט שוין פריער אנגערופן די טעריטאריע פראגע אלס איינע פון די שווערסטע אישוס אויפן טיש, און די גרויסע פראגע בלייבט יעצט צי די געשפרעכן וועלן זיך קענען רוקן פון בלויזע "מאמענטום" צו אן עכטע, פראקטישע דיעל.