דראמאטישע סצענעס אין פראנקרייך: איבער 1,300 ארעסטירט און צענדליגע פאליציאנטן פארוואונדעט ביי מאסיווע פראטעסטן

דראמאטישע ווידעא קליפס וואס צירקולירן אויפן אינטערנעט צייגן ווי פראנצויזישע ראיאט פאליציי, באוואפנט מיט העלמעטן און שוץ-שילדן, ארעסטירן מאסקירטע פראטעסטירער אויף די גאסן, בשעת די לופט איז אנגעפילט מיט רויך פון טרערן-גאז. אין די בילדער קען מען זען ווי פאליציאנטן יאגן נאך די ראיאטירער, פירן דורך ארעסטן אויפן טראטואר, און פרובירן צו ברענגען אונטער קאנטראל די כאאס וואס האט אויסגעבראכן.

די אומרוען זענען א טייל פון די מאסיווע פראטעסטן וואס זענען פארגעקומען איבער גאנץ פראנקרייך דעם 24'סטן אקטאבער 2026. די דעמאנסטראציעס האבן זיך ארגינעל אנגעהויבן אלס פרידליכע מארשן אין עטליכע הויפט שטעט, אריינגערעכנט פאריז, מארסעי, און בארדא, צו פראטעסטירן קעגן די הויכע 'קאסט אוו ליווינג', ווי אויך איבער פראבלעמען מיט די עדיוקעישאן סיסטעם און פובליק סערוויסעס. אבער עס האט זיך שנעל פארוואנדלט אין געוואלדטאטיגע צוזאמענשטויסן צווישן די מאסן און די פאליציי.

לויט די באריכטן זענען דורכאויס דעם וויקענד דורכגעפירט געווארן מער ווי 1,300 ארעסטן איבער'ן לאנד, און 53 פאליציאנטן זענען פארוואונדעט געווארן. די פראנצויזישע רעגירונג האט ארויסגעשטעלט אן אסטראנאמישע צאל פון ארום 70,000 פאליציאנטן און זיכערהייט קרעפטן צו האלטן ארדענונג און רעאגירן צו די געוואלדטאטן.

די מאסיווע פאליציי אפעראציע צייגט די שווערע מצב מיט וואס די פראנצויזישע אויטאריטעטן ספראווען זיך, ווען די עקאנאמישע דרוק ברענגט ארויס ריזיגע מאסן אין די גאסן. כאטש עס איז נאך דערווייל נישט קלאר געשטעלט געווארן די פונקטליכע לאקאציע פון די ספעציפישע ווידעא און צו די ארעסטירטע זענען דירעקט פארבינדן מיט די הויפט פראטעסטן, גיט עס אבער א קלארן בילד פון די אנגעצויגענע שטימונג און כאאס וואס הערשט יעצט אויף די פראנצויזישע גאסן.