סכנה פאר די צוקונפט: אפען עי-איי CEO ווארנט אז די שנעלע פארשריט פון עי-איי קען ארויסגיין פון קאנטראל און עס וועט זיין צו שפעט עס אפצושטעלן
גאלערי
ווידעאס
שארפע ווארענונג פון 'אפען-עי-איי' סי-אי-או: "די מענטשהייט קען פארלירן קאנטראל אויף 'עי-איי' טעכנאלאגיע"
דער סי-אי-או פון די באקאנטע 'אפען-עי-איי' (OpenAI) פירמע, סעם אלטמאן, האט ארויסגעגעבן א שארפע ווארענונג איבער די מעגליכע געפארן פון 'עי-איי' (ארטיפישעל אינטעלידזשענס) ביי א פארמאלע קאנגרעס פארהער. ער האט קלארגעשטעלט אז די געזעלשאפט קען אינגאנצן פארלירן קאנטראל אויפן צוקונפט צו די עי-איי טעכנאלאגיע. לויט אים, רוקט זיך די טעכנאלאגיע פאראויס מיט אזא שנעלן אימפעט, אז עס איז דא אן ערנסטע ריזיקע אז מענטשן וועלן מער נישט קענען מיטהאלטן וואס עס פאסירט, אדער זיך אריינמישן ווען עס פעלט זיך אויס.
אלטמאן האט ספעציעל ארויסגעברענגט דעם פראבלעם אז די שנעלע אנטוויקלונג פון עי-איי לויפט סאך שנעלער ווי די מענטשליכע אויפזיכט. ער האט געווארנט אז איינמאל די סיסטעמען הייבן אן צוגיין צו שנעל און גייען אריבער די מעגליכקייט פון מענטשן עס צו טרעקן, וועט זיין גאר שווער זיך אריינצומישן און אפשטעלן פראבלעמען. זיין הויפט זארג איז אז די טעכנאלאגיע וועט זיך אנטוויקלען צו א שטאפל וואס מענטשן וועלן פשוט נישט זיין אומשטאנד צו מאניטארן די סיטואציע אין 'ריעל-טיים' אדער רעאגירן ווי עס פאסט צו נייע פראבלעמען וואס קענען אונטערקומען.
די עדות'שעפט ברענגט ארויף פרישע זארגן איבער ווי שנעל די סיסטעמען ווערן קלוגער און צו די יעצטיגע זיכערהייט מיטלען זענען גענוג שטארק דאס צו קאנטראלירן. זיינע ווערטער האבן אויפגעוועקט ערנסטע פראגעס צו די רעגירונג און רעגולאציע אגענטורן זענען בכלל גרייט דערצו, ווי ווייט מענטשליכע אויפזיכט קען באמת ארבעטן, און וואספארא קאנקרעטע שריט מען דארף נעמען ווי אמשנעלסטן צו פארמיידן א מצב וואו די קאנטראל אויף פארגעשריטענע עי-איי גליטשט זיך ארויס פון די הענט.