בס"ד

עף-בי-איי פארמיידט אין די לעצטע מינוט א מאסן-מארד אטאקע אינעם 'מאל אוו אמעריקע'

פעדעראלע אגענטן האבן געמאלדן אז זיי האבן קוים פארמיטן א שרעקליכע טעראר אטאקע אינעם באקאנטן 'מאל אוו אמעריקע' אין מינעסאטע, נאכדעם וואס אן 'אנדערקאווער' עף-בי-איי אפעראציע האט געפירט צום ארעסט פונעם 18-יעריגן שיקדון אבדולאחי מאכאמוד.

דער יו. עס. אטוירני פאר מינעסאטע, דען ראזען, האט מיטוואך געמאלדן אז מאכאמוד איז שוין געווען אונטער אן עף-בי-איי אויספארשונג פאר קרוב צו צוויי יאר. דורכאויס די צייט האט ער זיך געשריבן מיט א געהיימע קוואל, וועמען ער האט געמיינט צו זיין אן אגענט פאר די טעראר גרופע 'אייסיס', און ער האט עטליכע מאל אויסגעדרוקט זיין גרייטקייט דורכצופירן א בלוטיגע אטאקע אין נאמען פון די גרופע.

לויט די געריכט קלאגעס וואס זענען יעצט ארויסגעגעבן געווארן, האט דער טעראריסט באשטימט דעם דאטום פונעם אטאקע אויף אקטאבער 24. זיין ציל איז געווען א קונסט-פייערונג וואס איז פארגעקומען אינעם מאל, מיט די קלארע ציל צו אומברענגען צענדליגע אומשולדיגע מענטשן.

די קעיס איז געקומען צו א קלימאקס דעם 6'טן אקטאבער, ווען מאכאמוד האט באצאלט 600 דאלאר פאר אן אנדערקאווער עף-בי-איי אגענט - וועלכער האט זיך פארגעשטעלט ווי אן אייסיס מיטגליד - אין אויסטויש פאר אן AK-47 סטייל רייפל און ארום 200 קוילן. די אגענטן האבן אים ארעסטירט אויפן ארט אין א פובליק פארק אין ריטשפילד, מינעסאטע, ווי נאר ער האט איבערגענומען דעם געווער.

ראזען האט ארויסגעברענגט אז דאס איז געווען א פאמעליכע און פארזיכטיגע צוויי-יעריגע אפעראציע צו מאניטארן און עווענטועל אפשטעלן די געפאר בעפאר עס קען פארוואנדלט ווערן אין א רעאליטעט. מאכאמוד איז פעדעראל אנגעקלאגט געווארן פארן קויפן א פייער-וואפן און אמוניציע מיט די ציל עס צו נוצן פאר א פעדעראלע טעראר פארברעכן.

באאמטע זאגן אז די קעיס איז א קלארע דערמאנונג אז די סכנה פון אייסיס-אינספירירטע טעראר אין אמעריקע איז נאך אלץ אקטיוו.