סעקרעטערי אוו סטעיט מארקא רוביא זאגט אז ער האט דינסטאג גערעדט דירעקט מיט דעם אוקראינישן פרעזידענט וולאדימיר זעלענסקי פאר 45 מינוט, מיטן ציל אויסצוקלארן וואס ער רופט אן "אומפונקטליכע מידיא באריכטן". רעדנדיג צו רעפארטערס אין אינדיע, האט רוביא קלארגעשטעלט אז אלעס וואס די 'דעפארטמענט אוו וואר' האט ביז יעצט געטאן מיט אוקראינע "בלייבט די זעלבע", און אז גארנישט האט זיך נישט געטוישט אין די אמעריקאנער שטיצע. ער האט צוגעלייגט אז מ'האלט נישט צוריק קיין שום זאך דירעקט פון אוקראינע, און עס איז נישט דא קיין שום פאליטישע אנווייזונג זיי צו שאטן.

פרעזידענט זעלענסקי האט אראפגעלייגט דעם טעלעפאנישן געשפרעך אלס א "סובסטאנציעלע", זאגנדיג אז מ'האט ארומגערעדט איבער מיסיל אינטערסעפטארס, פריע ווארענונגען איבער רוסישע באליסטישע אטאקעס, און די באגרעניצונגען אויף די 'סטארלינק' און 'סטארשילד' סערוויסעס.

די קלאנגען וואס רוביא האט פרובירט אפצוווענדן זענען הויפטזעכטליך געקומען פון אוקראינישע באאמטע, וועלכע האבן באשולדיגט וואשינגטאן אין ארויפשטעלן באגרעניצונגען וואס שטערט אוקראינע'ס מעגליכקייט צו אינטערסעפטן רוסישע מיסילס, וואס מאכט די אטאקעס פיל מער טויטליך. רוביא האט אנגערופן די טענות אז אוקראינער בירגער שטארבן צוליב דעם וואס אמעריקע האלט צוריק אינפארמאציע, אלס "סקאנדאליעז" און פאלש.

ער האט אנגעוויזן אז די פארפעלטע ווארענונגען אום אקטאבער 13 און אקטאבער 18 זענען געווען צוליב א "טעכנישע פראבלעם" און נישט צוליב אן אמעריקאנער פארארדענונג. ווי אויך האט ער ערקלערט אז ווען אוקראינע באקומט נישט קיין אינטערסעפטארס, איז עס ווייל אמעריקע דארף עס פאר אירע אייגענע געברויכן, און נישט ווייל מ'האלט עס בכיוון צוריק פון זיי. באריכטן געבן אן אז ער האט מודה געווען אז אמעריקאנער עיר-דיפענס מיסילס וואס זענען געקויפט געווארן פאר אוקראינע זענען מעגליך נאכנישט אנגעקומען.

דער געשפרעך קומט אין צייט פון א שארפע פובליק רייבונג, נאכדעם וואס פרעזידענט טראמפ האט געזאגט אז עס איז צייט אז א צווייטער זאל פארהאנדלען פאר אוקראינע, און אין די זעלבע צייט וואס אמעריקאנער שליחים דארפן זיך טרעפן מיט זעלענסקי אין אסלא.