שוידערליכע ווידעא: א צוויי-שטאקיגע הויז קראכט איין אין די ווילדע פארפלייצונגען אין נעפאל

א דראמאטישע ווידעא וואס איז פארשפרייט געווארן צייגט דעם שרעקליכן מאמענט ווי א צוויי-שטאקיגע הויז אויף א בארג אין נעפאל קראכט איין און פאלט אריין אין די ווילדע, בלאטיגע פארפלייצונגען, נאכדעם וואס די ערד אונטער דעם האט נאכגעגעבן. אינעם קליפ זעט מען ווי דאס הויז בייגט זיך איין און פליט אריין אין די שטורמישע וואסערן, איבערלאזנדיג א כאאס פון חורבות ארום.

די שרעקליכע סצענע קומט אין א צייט וואס דאס לאנד ליידט פון שווערע רעגנס וואס האבן זיך אנגעהויבן דעם 24'סטן סעפטעמבער. די שווערע וועטערס האבן געפירט צו מאסיווע פארפלייצונגען און ערד-גליטשענישן איבער עטליכע דיסטריקטן איבערן לאנד.

אפיציעלע באאמטע געבן איבער אז די שווערע וועטערס האבן שוין אומגעברענגט אמווייניגסטנס 21 מענטשן, רוב פון זיי דורך די ערד-גליטשענישן, בשעת נאך 5 זענען נאך אלס פארשוואונדן. הונדערטער הייזער זענען געשעדיגט אדער אינגאנצן חרוב געווארן.

די ארטיגע אויטאריטעטן האבן שוין עוואקואירט ארום 3,000 איינוואוינער פון די הויכע-ריזיקע זאנעס, פארמאכט געפארפולע גאסן, און ארויסגעשיקט העליקאפטערס אנצופירן מיט רעטונגס אפעראציעס אין די באטראפענע בערגיגע געגענטער.

הילפס-גרופעס ארבעטן אומערמידליך צוצושטעלן עסן און וויכטיגע געברויכן פאר די טויזנטער פאמיליעס וואס זענען געבליבן אן א דאך איבערן קאפ, בעת דאס לאנד ספראוועט זיך מיט די פרישע כוואליע פון חורבנות וואס קומט מיט די יערליכע מאנסון סעזאן. די בילדער פונעם איינגעפאלענעם הויז ברענגט ארויס די גרויסע סכנה אין וואס די איינוואוינער אויף די בערג געפינען זיך בעת די שווערע רעגנס.