וואל סטריט דזשורנאל: אמעריקע און מדינת ישראל גרייטן זיך פאר מאסיווע אטאקעס קעגן איראן נאך די מידטוירם וואלן

לויט א נייעם באריכט אינעם 'וואל סטריט דזשורנאל', גרייטן זיך די פאראייניגטע שטאטן און מדינת ישראל אויף א פרישע רונדע פון שווערע אטאקעס קעגן איראן, וואס זאל פארקומען נאך די נאוועמבער 3 מידטוירם וואלן.

אלס טייל פון די העפטיגע צוגרייטונגען, ווערט אריבערגעפירט א פרישע 'פאטריאט' מיסיל פארטיידיגונגס באטעריע פון טעקסאס קיין מדינת ישראל, באזירט אויף פלי-רעקארדס און באאמטע וואס ווערן ציטירט אינעם באריכט. אמעריקאנער קרעפטן זענען אויך פארנומען אנצופילן זייערע וואפן רעזערוון און גרייטן אן די באמבערס און קאמפס-עראפלאנען. וואשינגטאן האט לויט באריכטן געמאלדן פאר עטליכע אליאירטע לענדער אינעם גאלף ראיאן זיך צו גרייטן פאר א קורצע אבער העפטיגע מיליטערישע קאמפיין.

די ווייסע הויז האט אנטזאגט צו קאמענטירן איבער סענסיטיווע מיליטערישע פלענער. באריכטן געבן אן אז פרעזידענט דאנאלד טראמפ האט נאכנישט געמאכט קיין ענדגילטיגע באשלוס, אבער ער באטראכט די מעגליכקייט פון אטאקירן איראנער אינפראסטרוקטור און נוקלעארע צילן.

פון איר זייט האט איראן געווארנט אז זי וועט ענטפערן אויף סיי וועלכע נייע אטאקע מיט שווערע קלאפונגען אויף עקאנאמישע און ציווילע צילן איבערן גאנצן ראיאן, וואס דאס איז די סיבה פארוואס די ארומיגע לענדער גרייטן זיך אויפן ערגסטן.

דער יעצטיגער קאנפליקט האט זיך אנגעהויבן דעם 28'סטן פעברואר, און זינט דאן האבן ביידע זייטן נישט באוויזן צו האלטן א פייער-אפשטעל, און האבן זיך כסדר אויסטוישט מיט קלעפ איבער די הארמוז דורכגאס. באריכטן צייגן אז איראן האט אויסגענוצט די לעצטיגע רואיגע צייט איבערצובויען אירע מיסילס און פארטיידיגונגס סיסטעמען, און טייל אנאליסטן צווייפלען צי א נייע רונדע פון אטאקעס וועט בכלל דערגרייכן די געוואונטשענע צילן.

פרעזידענט טראמפ האט שוין קלארגעשטעלט אז ער וועט נישט אטאקירן בעפאר די מידטוירם וואלן, דעריבער קוקט מען ארויס מיט שפאנונג אויף די קומענדיגע עטליכע טעג. די גרויסע פראגעס יעצט זענען צי דיפלאמאטישע געשפרעכן קענען נאך צוריקהאלטן דעם מצב פון אן אויפרייס, און ווי ווייט א נייע רונדע פון קאמפן קען זיך פארשפרייטן.