איראן מעלדט: מיר פארברייטערן און פארבעסערן אונזער מיסיל ארסענאל אלס רעזולטאט פון די מלחמה מיט אמעריקע און מדינת ישראל

דער ווארטזאגער פון די איראנער ארמיי, בריגאדיר גענעראל מאכאמאד אקראמיניא, האט אפיציעל באשטעטיגט אז טעהראן ארבעט יעצט העפטיג צו 'אפגרעידן' און פארבעסערן איר מיסיל ארסענאל, אנווייזנדיג דירעקט אויף די לעקציעס וואס זיי האבן זיך געלערנט פון די לעצטיגע מלחמה מיט די פאראייניגטע שטאטן און מדינת ישראל.

"דורכאויס די מלחמה זענען מיר געקומען צום אויספיר אז מיר מוזן אומבאדינגט פארגרעסערן די שטרעקע (רעינדזש) פון אונזערע מיסילס, וויבאלד דער פיינט געפינט זיך יעצט פיל ווייטער פון אונזערע ברעגעס," האט אקראמיניא געזאגט אין אן אינטערוויו מיט די איראנער 'פארס' נייעס אגענטור. "מיר האבן זיך שוין אנגעהויבן רוקן אין דעם ריכטונג."

ער האט צוגעגעבן אז די פיינטליכע קרעפטן אפערירן יעצט אין א ווייטקייט פון ביז 1,000 קילאמעטער פון די איראנער ברעגעס, א טויש וואס האט לויט טעהראן ארויסגעברענגט ערנסטע בלויזן אין זייער יעצטיגע מיסיל מעגליכקייטן און שנעלקייט.

אקראמיניא האט זיך אבער נישט אפגעשטעלט נאר ביי די ווייטקייט. ער האט קלארגעשטעלט אז די נייע אפגרעידס וועלן ארייננעמען די גאנצע מיסיל אינווענטאר פון די ארמיי, און וועט דעקן סיי די שנעלקייט (ספיד) און סיי די פונקטליכקייט פון די וואפנס. אין די זעלבע צייט האט ער אויסגעלויבט די סוקסעסן פון די מיסילס וואס זענען געשאסן געווארן פון דער יבשה און האבן געטראפן פיינטליכע באזעס אין קוווייט, ווי אויך די ים-געשאסענע קרוז מיסילס וואס האבן באטראפן פיינטליכע שיפן דורכאויס די מלחמה, אנרופנדיג די רעזולטאטן אלס "עפעקטיוו", כאטש איראן זוכט יעצט צו גיין נאך ווייטער.

די פרישע מעלדונג קומט אין א צייט וואס די אנגעצויגנקייטן צווישן טעהראן און וואשינגטאן האלטן זיך ווייטער גאר הויך. אין די זעלבע צייט האלט איראן ווייטער אן איר סטראטעגיע אז די קריטישע 'הארמוז דורכגאס' (Strait of Hormuz) וועט בלייבן פארמאכט ביז א רייע פאדערונגען ווערן נאכגעגעבן. פאר א מיטל מזרח ראיאן וואס איז שוין אזוי אויך אויף שפילקעס, איז אזא אפיציעלע מעלדונג איבער דאס פארברייטערן די איראנער מיסיל קראפט א קלארער סיגנאל וואס וועט זיכער אפקלינגען פיל ווייטער ווי אירע אייגענע גרעניצן.