ראבאטן נעמען איבער די גאסן: כינע שטעלט פאר ארומפארנדיגע מיסט קאסטנס און 'ווענדינג מאשינען'

שטעלט אייך פאר א בילד ווי א מיסט קאסטן קומט צו פארן צו אייך אין פארק, אדער א 'ווענדינג מאשין' ווארט מיט געדולד אז איר זאלט קויפן א נאש. דאס איז די נייע רעאליטעט וואס כינע צייגט איצט ארויס, מיט ארומפארנדיגע ווענדינג מאשינען און מיסט קאסטנס וואס זענען באריכטעט געווארן אין פארקן און נעבן באן סטאנציעס.

איר דארפט בלויז מאכן א צייכן מיט די האנט, און דער קאסטן שטעלט זיך אפ צו נעמען אייער מיסט, בעת א ווענדינג מאשין דרייט זיך ארום ביז איר קויפט עפעס צום עסן. טייל פון די מאשינען קענען אפילו אליינס צוריקפארן צו זייערע טשארדזשינג סטאנציעס זיך אנצופילן מיט פרישע סחורה אדער באטעריע. מען קען אויך רופן קלינינג ראבאטן דירעקט צו זיך אינדערהיים, וואס מאכט דאס גאנצע זאך אויסזען ווי א סצענע פון א פילם.

כינע פארוואנדלט אירע שטעט אין אן עכטע פראבע-פעלד פאר ראבאטיקס, און די ביישפילן ווערן נאר מער און מער. ראבאטן זענען שוין אריינגעברענגט געווארן אין 14 פארקן איבער די הויפטשטאט בעידזשינג. אין די שטאט שענזשען האט מען אראפגעשיקט דעליווערי ראבאטן צו פארן אויפ'ן סאבוועי אנצופילן לאקאלע קאנוויניענס געשעפטן מיט סחורה, און אין העפעי האט מען אנגעהויבן נוצן ראבאטישע הינט און דראונס אין איר באן סיסטעם.

כאטש נישט יעדע איידיע וועט זיך אויסארבעטן, קען מען אבער יעדע זאך אויספרובירן אין עכטע אומשטענדן בעפאר מען הייבט אן א מאסיווע פראדוקציע. עס בלייבן נאך אלץ פראגעס איבער די קאסטן, די זיכערהייט צווישן גרויסע מאסן מענטשן, און ווי ווייט די מאשינען וועלן זיך פאקטיש פארשפרייטן אינדרויסן פון די פראבע פראדזשעקטן. דאך, אויב דער טרענד גייט ווייטער אן, קען מען זיך גאנץ קורץ טרעפן אין א מצב וואו די געשעפטן זוכן די קונים, אנשטאט די קונים זאלן דארפן זוכן די געשעפטן.