שרעקעדיגע סצענע אין איסטאנבול: א טוריסטן פעררי קראכט אריין אין א פריוואטע דאק פון א היסטארישע מענשאן

א רואיגע טוריסטן קרוז ביינאכט אויפ'ן באספארוס טייך אין איסטאנבול האט זיך פארוואנדלט אין א כאאס דעם פארגאנגענעם אקטאבער 6, ווען א פאסאזשירן פעררי האט זיך ארויסגעדרייט פון איר קורס און אריינגעקראכט אין די אזיאטישע ברעג אין די קאנדילי געגנט, ארום 10:20 ביינאכט.

זיכערהייט קאמערעס צייגן ווי די שיף קומט צו פליען צום ברעג, קראכט אריין אין א געפארקטע יאכט שיפל, און רייסט דערנאך אדורך די געלענדערס פון א פריוואטע דאק וואס באלאנגט צום היסטארישן "קאזאסקער נעקמעטין עפענדי" מענשאן, א געביידע וואס איז אלט קרוב צו 200 יאר. צום סוף פונעם ווידעא זעט מען ווי די פעררי בעקט זיך ארויס פונעם חורבן און קערט זיך צוריק אריין אין וואסער. אויף א וואונדערליכן פארנעם איז קיינער נישט פארוואונדעט געווארן, אבער די דאק און די פראפערטי האבן געליטן שווערע שאדנס.

די אייגנטומערין פונעם מענשאן, דערין מערמערסי, האט ארויפגעשטעלט ענליכע קליפס אויף אינסטעגראם, זאגנדיג אז אירע קינדער זענען געווען אין הויז בשעת'ן קראך און זענען געווארן טויט-דערשראקן, און אז איר דאק איז אינגאנצן חרוב געווארן. זי האט צוגעגעבן אז זי האט שוין גערעדט מיטן קאפיטאן פון די פעררי נאכן אינצידענט און זי פלאנט צו נעמען לעגאלע שריט. לויט די טערקישע מידיא זענען די פאליציי און קאוסט גארד טיעמס זייער שנעל אנגעקומען אויפן סצענע.

דער אינצידענט האט אויך צוריק ארויפגעברענגט אירע קאמענטארן פון אנהייב יאר, ווען זי האט זיך אפגערעדט אז וואוינען אין א מענשאן ביים באספארוס טייך ברענגט "בלויז צרות". דערווייל איז נאך נישט איבערגעגעבן געווארן קיין שום ערקלערונג פארוואס די פעררי האט זיך ארויסגעדרייט פון איר קורס, וואס לאזט איבער א גרויסע פראגע צייכן איבער די טוריסטן קרוזעס אויף איינע פון די פארנומענסטע וואסער-וועגן אין דער וועלט. צו די קאמפאני וועט געהאלטן ווערן פאראנטווארטליך פאר די שאדנס, וועט יעצט ווארשיינליך דארפן באשלאסן ווערן אין געריכט.