א פליענדיגע מאשין-געווער: 'איזראעל עראוספעיס אינדוסטריס' צייגט פרישע דראון וואס קען טוישן דעם פנים פון שלאכטפעלד

די פירמע 'איזראעל עראוספעיס אינדוסטריס' (IAI) האט ארויסגעשטעלט א נייע דראון וואס אירע אייגענע באשאפער רופן אן אלס א "פליענדיגע מאשין-געווער", און די בילדער דערפון ציען אויפמערקזאמקייט איבער די גאנצע וועלט. די נייע דראון, וואס ווערט אנגערופן "פייער סטורעם" (FIRE STORM), איז א קוואדקאפטער פון די קומענדיגע גענעראציע וואס קאמבינירט א מאשין-געווער מיט א לאנגע צייט אין די לופטן. די דראון פארמאגט א מאטאר וואס קען נוצן עטליכע סארטן ברענשטאף, וואס ערלויבט איר צו פליען אין די לופטן פאר ארום דריי שעה.

לויט די פירמע קען עס הייבן א וואג ביז 35 קילאגראם, עס פאדערט מינימאלע לאגיסטישע הילף, און איז געבויט צו קענען מיטפארן מיט טאקטישע איינהייטן אזוי אז מען זאל שטענדיג האבן פייער-קראפט גרייט פון די לופטן אין פאל פון אן עמערדזשענסי. אין א ווידעא וואס איז ארויסגעגעבן געווארן קען מען זען וויאזוי מען שטעלט עס צוזאם אויף דער ערד, טעסט פליען אין די מדבר, און וויאזוי די טערמאל קאמערעס כאפן אויף צילן און לאקן זיך ארויף אויף סימולירטע פיגורן פון פארשידענע ווייטקייטן און הויכקייטן.

די נייעס איז געווארן נאך גרעסער די וואך, ווען IAI אינאיינעם מיט די באקאנטע וואפן פירמע 'סיג סאוער' (SIG SAUER) האבן געמאלדן ביי די AUSA 2026 קאנפערענץ אין וואשינגטאן, אז זיי האבן סוקסעספול דורכגעפירט א פראבע מיט לעבעדיגע פייער פון די "פייער סטורעם 250" מאדעל.

די ספעציפישע ווערסיע טראגט א 'סיג סאוער M250' מאשין-געווער אויף א רימאוט קאנטראל סיסטעם, מיט ארום 200 קוילן, און די גאנצע וואפן סיסטעם וועגט ארום 24 קילאגראם. לויט די פירמעס האט די דראון זיך געהאלטן אין די לופטן איבער א סימולירטע שלאכטפעלד, אויפגעכאפט צילן מיט איר קאמערע, און געשאסן סיי איינציגע קוילן און סיי האלב-אויטאמאטישע פייער פון פארשידענע ווייטקייטן. עס איז וויכטיג צו באטאנען אז א מענטשליכע אפערעיטאר האלט די פולע קאנטראל איבער יעדע באשלוס צו עפענען פייער, און די דראון שיסט נישט אליינס.

די סיסטעם ווערט אהערגעשטעלט אלס א געוואלדיגע הילף פאר נאנטע לופט שטיצע, גרעניץ זיכערהייט, און צו היטן אויף וויכטיגע לאקאציעס. עטליכע דראונס קענען זיך טוישן שיפטס צו האלטן אן אויג 24 שעה א טאג. באוואפנטע דראונס טוישן שוין יעצט די וועג וויאזוי קלענערע מיליטערישע איינהייטן פירן מלחמות, און א פליענדיגע מאשין-געווער וואס קען בלייבן אין די לופטן פאר שעות לאזט אסאך מענטשן זיך וואונדערן ווי ווייט די טעכנאלאגיע וועט נאך אנקומען.