בס"ד

110 ראבאטן, איין טאקט: הומאנויד ראבאטן ברעכן גינעס רעקארד מיט סינכראניזירטע טאנץ

אום אקטאבער 24, 2026, אין דזשינאן, כינע, האבן 110 "אגיבאט עקספעדישן עי-3" (AgiBot Expedition A3) הומאנויד ראבאטן געטאנצן אינאיינעם און אויפגעשטעלט א נייעם 'גינעס ווארלד רעקארד' פאר די מערסטע צאל הומאנויד ראבאטן וואס טאנצן אין די זעלבע צייט.

פאר מער ווי פינף מינוט האבן די ראבאטן דורכגעפירט א קאמפליצירטע און פונקטליכע טאנץ, מיט סינכראניזירטע באוועגונגען, טוישן פאזיציעס, שפרינגען און פליפן, כמעט ווי איין גרויסע קאארדינירטע גרופע. אן אפיציעלער פארשטייער פון 'גינעס ווארלד רעקארדס' איז געווען אויפן ארט צו באשטעטיגן דעם רעקארד. לויט די פירמע האבן די ראבאטן זיך געהאלטן אין סינק ביז צו א מיליסעקונדע. די ווידעא פונעם טאנץ ציט אסאך אויפמערקזאמקייט, וויבאלד רוב מענטשן זענען נאר צוגעוואוינט צו זען איין אזא ראבאט זיך באוועגן אויף אמאָל.

די גאנצע פראגראם איז געלאפן דורך א ספעציעלע קאנטראל פלאטפארמע פון די פירמע, וואס האט געהאלפן יעדן ראבאט וויסן פונקטליך וואו ער געפינט זיך אויפן פלאר ביז א צענטימעטער פונקטליך. די פירמע גיט איבער אז אלע 110 ראבאטן זענען געווען סטאנדארטע מאסן-פראדוקציע מאדעלן, און נישט קיין ספעציעלע געבויטע ראבאטן נאר פאר דעם שוי. זיי האבן אלע גענוצט די זעלבע פראגראמירונג צו מאכן די באוועגונגען.

די פירמע זאגט אז די ציל פון דעם עווענט איז געווען צו טעסטן ווי גוט מ'קען קאארדינירן א גרויסע גרופע ראבאטן אויף איין מאל, וואס קען מעגליך גענוצט ווערן אין די צוקונפט פאר טוריזם פראגראמען, עדיוקעישן, פובליק סערוויסעס און ריסערטש. כאטש וואס א פאראויס-פראגראמירטע טאנץ אין א קאנטראלירטע סביבה באווייזט נאכנישט אז די ראבאטן קענען זיך אן עצה געבן מיט קאמפליצירטע ארבעט אין די עכטע וועלט צווישן מענטשן, איז עס אבער א באדייטנדע שריט פאראויס אין די טעכנאלאגיע פון קאנטראלירן אסאך ראבאטן אויף איין מאל.