אינטערעסאנטע רעטונג אקציע: פאליציי ראטעוועט א הונטעלע פון א קאנאליזאציע רער מיט אן אייגנארטיגן מיטל - א באקעט מיט קעז

ווען פאליציי אפיצירן פונעם טעמפא פאליציי דעפארטמענט זענען ארויסגערופן געווארן נאכדעם וואס מען האט געהערט קלאנגען פון א הונטעלע קומען פון א קאנאליזאציע רער (storm drain), האבן זיי באלד איינגעזען אז א געווענליכע רעטונג אקציע גייט דא נישט ארבעטן. א קליין הונטעלע איז געווען פארכאפט טיף אינעם שמאליגן רער, צו ווייט און צו דערשראקן אז מען זאל אים קענען דערגרייכן מיט די הענט.

אנשטאט צו נוצן קראפט, האבן די אפיצירן זיך צוזאמגעשטעלט מיט א לאקאלן בירגער אויפ'ן סצענע און אויפגעקומען מיט אן אומגעווענליכע פלאן: זיי האבן אראפגעלאזט א באקעט אנגעפילט מיט קעז. באדי-קעמערע ווידעא וואס די דעפארטמענט האט שפעטער ארויסגעגעבן צייגט די גאנצע רעטונג, וואו מען זעט ווי די פאליציי לאזט אראפ דעם באקעט אינעם טונקעלן רער און ווארט געדולדיג אז דער פלאן זאל זיך אויסארבעטן.

עס האט טאקע נישט געדויערט לאנג ביז דער הונגער האט איבערגעוואויגן די שרעק. דאס הונטעלע, געצויגן צום גערוך פונעם קעז, איז אריינגעשפרינגען אינעם באקעט, און די אפיצירן האבן אים פאָרזיכטיג ארויפגעצויגן צום אויבערפלאך אין זיכערהייט. די פאליציי דעפארטמענט האט שפעטער געטיילט די ווידעא אויף סאשעל מידיא מיט א גוט-מוטיגע תגובה איבער זייער אייגנארטיגע המצאה. "הגם מען לערנט נישט אויס די 'באקעט-און-קעז' טעכניק אין די פאליציי אקאדעמיע, האבן אונזערע אפיצירן געוואוסט וויאזוי צו טראכטן ארויס פון די באקס און זיכער מאכן אז דער פיר-פיסיגער איינוואוינער קומט ארויס בשלום," האט די דעפארטמענט געשריבן. דאס איז א קלארע ביישפיל וויאזוי פאליציי אפיצירן נוצן אפטמאל זייער קעפל פאר שנעלע און קריעטיווע לעזונגען אין סיטואציעס וואס האבן גארנישט מיט קיין פארברעכנס.

איינמאל דאס הונטעלע איז געווען אינדרויסן פונעם רער, האבן די אפיצירן אים איבערגעגעבן פאר די 'ענימעל קאנטראל' אגענטור פאר א טשעקאפ און באהאנדלונג. פון דארט איז די מעשה נאר געווארן בעסער. לויט די טעמפא פאליציי, איז דאס געראטעוועטע הונטעלע שוין זינט דאן אדאפטירט געווארן דורך א פאמיליע וואס האט אים אריינגענומען צו זיך אינדערהיים. די רעטונג איז א קליינע אבער שיינע דערמאנונג וויאזוי א שנעלע המצאה און אביסל צוזאמענארבעט צווישן די פאליציי און פשוט'ע בירגער קען פארוואנדלען א שרעקעדיגע סיטואציע אין א גוטן ענדע.