שוידערליכע סצענעס אין איטאליע: מאכטפולער שטורעם ווארפט ארום פליגערס ווי שפילצייג אין לאקאלן עירפארט

א מאכטפולער שטורעם האט איבערגעלאזט שאקירנדע סצענעס ביי אן איטאליענישן עירפארט די וואך, ווען מען זעט אויף א ווידעא ווי שטארקע ווינטן ווארפן ארום קליינע פליגערס אויפ'ן טארמאק ווי זיי וואלטן געווען פשוט'ע שפילצייג. די שווערע וועטערס האבן באטראפן צפון און צענטראל איטאליע דעם אוגוסט 20 און 21, ברענגענדיג מיט זיך שווערע רעגנס, פארפלייצונגען און גרויסע חורבנות.

די שוידערליכע ווידעא איז רעקארדירט געווארן אינעם 'פארלי' עירפארט אין די עמיליא-ראמאניא ראיאן, וואו די אויטאריטעטן האבן געמוזט צייטווייליג אפשפארן דעם עירפארט פאר ארום א שעה צייט בעת דער שטורעם איז אריבערגעגאנגען. לאקאלע באאמטע געבן איבער אז זיי האבן דורכגעפירט מער ווי 150 עמערדזשענסי אפעראציעס איבער די ראיאן, נאכדעם וואס צענדליגע ביימער זענען אראפגעריסן געווארן דורך די מאכטפולע ווינטן וואס האבן געבלאזן מיט א שנעלקייט פון איבער 100 קילאמעטער א שעה, וואס צייגט ווי געפארפול די מצב איז געווען.

דער שטורעם איז א טייל פון א ברייטערע כוואליע פון עקסטרעמע וועטערס וואס האט באטראפן עטלעכע איטאליענישע ראיאנען, אריינגערעכנט ליגוריא, טאסקאני, לאמבארדי און עמיליא-ראמאניא. אין טאסקאני אליינס זענען רעקארדירט געווארן איבער 23,000 בליצן דורכאויס דעם שטורעם, בשעת די ווינטן האבן דערגרייכט 106 קילאמעטער א שעה ביים בארטן און 103 קילאמעטער א שעה אין די פלארענץ פראווינץ. די שווערע רעגנס האבן אויך געפירט צו ערנסטע פארפלייצונגען, אראפגעפאלענע ביימער, קראפט פארלוסטן און שאדנס צו אינפראסטרוקטור איבער די באטראפענע געגנטער.

עוויאעישאן עקספערטן ערקלערן אז די עירפארט ווידעא איז באזונדער אינטערעסאנט, ווייזנדיג ווי קליינע פליגערס זענען גאר סענסיטיוו צו שטארקע ווינטן אפילו ווען זיי זענען אויף דער ערד, צוליב זייער לייכטע וואג. כאטש עס זענען נישט באריכטעט געווארן קיין ערנסטע עקסידענטן מיט קאמערציאלע פליגערס, צייגט אבער די סצענע פארוואס עירפארטס זענען געצווינגען אפצושטעלן אלע אפעראציעס ווען עקסטרעמע ווינטן שטעלן א סכנה.

די בילדער ברענגען ארויס ווי שנעל א זומער-שטורעם קען זיך פארוואנדלען אין אן ערנסטע סכנה, ברענגענדיג בליצן, פארפלייצונגען און ווינטן וואס זענען גענוג שטארק צו פאראליזירן אן עירפארט און ארומווארפן שווערע חפצים. בעת די שווערע וועטערס האלטן נאך אן אין טיילן פונעם לאנד, גיט די ווידעא א קלארן בליק אויף די שווערע אומשטענדן מיט וואס די עמערדזשענסי ארבייטער ספראווען זיך יעצט אויפ'ן פעלד.