בס"ד

מדינת ישראל מיליטער רוקט אריבער א שוואדראן פון 'אפאטשי' העליקאפטערס צו א באזע אין צפון

די מדינת ישראל לופט-פלאט האט אריבערגעפירט איר 190'סטע שוואדראן פון 'AH-64A אפאטשי' אטאקע העליקאפטערס פון די 'רמון' לופט-באזע צו די 'רמת דוד' באזע אין צפון.

דער שריט שטעלט די קאמפס-העליקאפטערס פיל נענטער צום צפון גרעניץ, מיט'ן ציל צו פארשטארקן די מעגליכקייט פונעם מיליטער צו רעאגירן שנעל צו סיי וועלכע טרעטס און סטראשונגען אין די ראיאן. דאס קומט אין די צייט וואס דאס מיליטער האלט אין איין טוישן און צופאסן אירע פאזיציעס, געבויט אויף די לעקציעס וואס זיי האבן זיך געלערנט פון די שמחת תורה אטאקעס.

דאס מיליטער זאגט אז דער טראנספער איז געמאכט געווארן צו פארבעסערן די גרייטקייט פון די העליקאפטער פלאטע, דורכ'ן צעטיילן די שוואדראנען צווישן צפון און דרום. אנשטאט צו האלטן אלע קאמפס-העליקאפטערס קאנצענטרירט אין איין געגנט, וועט די צעשפרייטונג פארזיכערן אז די עראפלאנען קענען ווערן ארויסגעשיקט פיל שנעלער און מער עפעקטיוו ווען עס מאכט זיך אן עמערדזשענסי אויף עטליכע פראנטן אויפאמאל. די אפאטשי פלאטע גיט פאר'ן מיליטער א מעכטיגע קראפט פון נאענטע לופט-שטיצע און פונקטליכע אטאקעס קעגן צילן אויף דער ערד.

די באשלוס איז א טייל פון א ברייטערע קאמפיין צו פארבעסערן די מיליטערישע אינפראסטרוקטור נאך די שוואכקייטן וואס זענען ארויסגעשטעלט געווארן אום שמחת תורה. דאס פלאצירן דעם 190'סטן שוואדראן אין רמת דוד גיט פאר די לופט-פלאט א שטערקערע אנוועזנהייט אין צפון, בשעת זיי האלטן אן זייערע קראפטן אין דרום.

כאטש וואס דער שריט באדייט נישט דוקא אז א פרישע אפעראציע גייט זיך אנהייבן אין די נאענטע צוקונפט, צייגט עס אבער אז דאס מיליטער גרייט זיך אויף די מעגליכקייט פון א מלחמה אויף עטליכע פראנטן אין די זעלבע צייט. דורכ'ן רוקן די אפאטשי העליקאפטערס ווייטער קיין צפון, לייגט דאס מיליטער א שטארקע פאקוס אויף צו פארמינערן די צייט וואס עס נעמט צו רעאגירן צו אן אטאקע. דאס איז נאך א קלארע ביישפיל וויאזוי די ערפארונג פונעם יעצטיגן קריג טוישט דעם וועג וויאזוי די לופט-פלאט פלאצירט אירע וויכטיגסטע קאמפס-מיטלען.