זעלענסקי מעלדט: די 'סטארלינק' אינטערנעט ספיד אויפן פראנט איז צוריק צו נארמאל נאך א וואך פון שטערונגען

דער אוקראינישער פרעזידענט וולאדימיר זעלענסקי האט שבת (אקטאבער 24) געמאלדן אז די 'סטארלינק' און 'סטארשילד' אינטערנעט ספידס זענען צוריקגעשטעלט געווארן צום נארמאלן קראפט, פונקט ווי בעפאר די לעצטיגע באגרעניצונגען. לויט זעלענסקי, האט זיך די פראצעדור אנגעהויבן איבערנאכט, און ביז אינדערפרי איז די ספיד שוין געווען צוריק אין פולן שוואונג.

זעלענסקי האט ארויסגעברענגט אז דאס איז קריטיש וויכטיג פאר די לאגיסטיקס אויפן פראנט-ליין, און ספעציעל זיך צו קענען פארטיידיגן קעגן די שנעל-פליענדע רוסישע 'שאהעד' דראונס. די אוקראינישע פארטיידיגונגס מיניסטעריום האט באשטעטיגט די נייעס, זאגנדיג אז די קאנעקשאן איז יעצט סטאביל אפילו אויף אביעקטן וואס פליען שנעלער ווי 400 קילאמעטער א שעה. אין די לעצטע וואך צייט האבן אוקראינישע קאמאנדירן זיך קריטיש באקלאגט אז די שוואכע אינטערנעט האט געשטערט אפעראציעס און געפירט צו פארלוירענע דראונס און איבערגעריסענע מיסיעס אויפן שלאכטפעלד.

די מעלדונג קומט נאכדעם וואס אילאן מאסק האט פריער באשטעטיגט אז זיין פירמע 'ספעיס-עקס' האט בכוונה אראפגערוקט די ספיד, טענה'נדיג אז די אוקראינישע מיליטער האט פארלעצט די פירמע'ס פאליסיס דורכ'ן נוצן די ציווילע סיסטעם פאר אפענסיווע דראון אטאקעס - א טענה וואס אוקראינישע באאמטע לייקענען קאטעגאריש. מאסק האט אויך אנגעוויזן אז די מיליטערישע ווערסיע פונעם אינטערנעט, באקאנט אלס 'סטארשילד', ווערט קאנטראלירט דורך די אמעריקאנער רעגירונג, וואס לאזט איבער אומקלאר ווער פונקטליך עס האט ארגינעל געגעבן דעם באפעל צו פאמעלעך מאכן די ספיד.

אין זיין רעדע האט זעלענסקי זיך שטארק באדאנקט פאר די אמעריקאנער רעגירונג און אנדערע אליאירטע וואס האבן גענומען דעם פראבלעם ערנסט. ער האט ספעציפיש דערמאנט קאנגרעסלייט, סענאטארן, די מידיא, די סטעיט דעפארטמענט און דעם פרעזידענט, ענדיגנדיג מיט די קורצע אבער שארפע ווערטער: "פארטיידיגן לעבנס איז וויכטיג."

דערווייל בלייבט אבער אומקלאר וואס פונקטליך עס האט געפירט דערצו אז די ספיד זאל צוריקגעשטעלט ווערן, און צי אוקראינע קען זיך פארלאזן דערויף אז די קאנעקשאן וועט בלייבן סטאביל אויף ווייטער.