דראמאטישע ווידיאו: כינעזע קאוסט גארד שיף קראכט אריין אין א פיליפינישע שיף אינעם 'סאוט טשיינע סי'

א נייע דראמאטישע ווידיאו וואס איז היינט פארעפנטליכט געווארן צייגט דעם מאמענט ווי א כינעזע קאוסט גארד שיף, אידענטיפיצירט אלס CCG-21585, מאנעוורירט זייער נאנט און קראכט אריין דירעקט אין א פיליפינישע רעגירונגס שיף (BRP Datu Magat Salamat) וואס געהערט צו די פיליפינישע פישעריי דעפארטמענט.

דער אינצידענט האט זיך אפגעשפילט צפון פון די 'אבאד סאנטאס שאול', בעת די פיליפינישע שיף איז געווען אויף א רוטינע מיסיע צו טיילן ברענשטאף פאר לאקאלע פיליפינישע פישער. דער קראך איז פארגעקומען ארום 54 נאטישע מייל פונעם פאלאוואן בארטן, און קוים זעקס מייל פונעם שאול זעלבסט.

לויט פיליפינישע באאמטע איז דאס געווען א דירעקטע און בייזוויליגע אטאקע פון די כינעזע שיף. דער קראך האט איבערגעלאזט שאדנס צו די דעק און געלענדער פון די פיליפינישע שיף, עס זענען אבער נישט באריכטעט געווארן קיין פארוואונדעטע. די פיליפינען טענה'ן אז דער ארט פונעם אינצידענט איז בלויז 100 קילאמעטער פון זייער טעריטאריע און געהערט צו זייער עקאנאמישע זאנע, בעת עס איז מער פון 800 קילאמעטער ווייט פון כינע.

פון די אנדערע זייט געבן כינעזע קוועלער איבער אן אינגאנצן אנדערע ווערסיע פון די געשעעניש. זיי טענה'ן אז די פיליפינישע שיף האט איגנארירט עטליכע ווארענונגען און האט זיך אריינגעשניטן הארט פארנט פון די כינעזע קאוסט גארד שיף, וואס האט געפירט צום עקסידענט אין די קאנטראווערסיאלע 'ספראטלי איילענדס' וואסערן.

די נייע ווידיאו, וואס איז רעקארדירט געווארן פון די פיליפינישע שיף, האט שוין אנגעצויגן די לאנג-יעריגע שטימונג און קאנפליקטן איבער די רעכטן און קאנטראל אינעם 'סאוט טשיינע סי'. דער עפיזאד ברענגט ארויף ערנסטע פראגעס וויאזוי ביידע זייטן וועלן רעאגירן, צי אזעלכע נאנטע קאנפראנטאציעס וועלן פירן צו אן ערנסטע עסקאלאציע, און וואס דאס באדייט פאר די לאקאלע פישער וואס מאכן זייער פרנסה אין די וואסערן. דאס אונטערשטרייכט נאכאמאל ווי סענסיטיוו און אנגעצויגן די סיטואציע איז אין איינע פון די מערסט-קאנטראווערסיאלע וואסער-זאנעס אין דער וועלט.