מאסיווע עקספלאוזשען טרייסלט אויף אינדוסטריעלע געביידע אין אהייא; צוויי ארבעטער פעלן

טאלעדאו, אהייא. – א שווערע עקספלאוזשען האט היינט פארטאגס אויפגעטרייסלט אן אינדוסטריעלע קלינינג פאסיליטי אין טאלעדאו, אהייא, איבערלאזנדיג צוויי ארבעטער וואס פעלן נאך, בשעת פייערלעשער האבן געקעמפט מיט די מאסיווע פלאמען.

דער אינצידענט האט פאסירט קורץ פאר 5:00 אזייגער פארטאגס ביים 2900 בלאק פון סאוט עוועניו, ביי די 'ברענט אינדוסטריס' פאבריק. פונקט אינמיטן א 'שיפט' טויש, ווען א שיינע צאל ארבעטער זענען געווען אין די געביידע, האבן צוויי מעכטיגע אויפרייסן פאסירט, וואס איז לויט באריכטן פארבונדן צו קלינינג כעמיקאלן. די פלאמען האבן זיך געהויבן צו איבער 100 פיס אין די הייך, און א טייל פון די געביידע איז איינגעפאלן פון די קראפט פון די עקספלאוזשען, לאזנדיג שווערע וואלקענעס פון רויך וואס מ'האט געקענט זען איבער די גאנצע געגנט.

עמערדזשענסי רעספאנדערס און פייערלעשער פון עטליכע דעפארטמענטס זענען שנעל אראפגעקומען אויפן סצענע צו קעמפן מיט'ן פייער און זוכן פאר מענטשן וואס זענען מעגליך פארכאפט געווארן. דערווייל פעלן נאך צוויי ארבעטער, בשעת אנדערע ארבעטער האבן נאר געליטן לייכטע וואונדן און האבן באוויזן צו אנטלויפן. באאמטע האבן ארויסגעברענגט אז ראטעווען לעבנס איז די העכסטע פריאריטעט, און זוך-טיעמס קוקן אדורך די טיילן פון די געביידע וואס זענען נאך געבליבן גאנץ און קענען מעגליך דינען אלס שוץ פון די פלאמען.

דאס פייער איז שוין געווען מער-ווייניגער אונטער קאנטראל ארום 6:15 אינדערפרי, כאטש די רויך האט נאך ווייטער געשטיגן פאר לאנגע שעה'ן דערנאך. די ארבעט פון די פייערלעשער איז לכתחילה געווארן שווערער צוליב א געפלאצטע וואסער-פייפ וואס האט אראפגעברענגט די פרעשור ביי די לאקאלע פייער היידראנטס, ביז מ'האט עס באוויזן אפצוהאקן.

'ברענט אינדוסטריס' געט זיך אפ מיט אינדוסטריעלע ריסייקלינג און טעקסטייל, ווי שמאטעס און האנטוכער. די טאלעדאו פייער דעפארטמענט, אינאיינעם מיט אנדערע ארומיגע דעפארטמענטס, האבן געבעטן דעם פובליק זיך צו האלטן ווייט פונעם סצענע פאר זייער אייגענע זיכערהייט.

אינוועסטיגעיטארס וועלן ארבעטן אין די קומענדיגע טעג צו דערגיין די פונקטליכע אורזאך פון די כעמיקאלע אויפרייסן. דערווייל בלייבט די הויפט פאקוס אויף צו טרעפן די צוויי פארשוואונדענע ארבעטער און זיכער מאכן אז די געגנט איז פולשטענדיג פארזיכערט.