אינטערנאציאנאלער זינגער 'בוי דזשארדזש' קומט אן קיין מדינת ישראל פאר קאנצערטן טראץ שווערע בויקאט רופן

דער באקאנטער זינגער בוי דזשארדזש (Boy George) האט געלאנדעט אין מדינת ישראל, און לויט ווי ער זאגט, זענען עס געווען די זארגן און פחדים פון זיינע אידישע פריינט וואס האבן אים געשטיפט צו מאכן די רייזע. דער געוועזענער פראנטמאן פון די 'קאלטשור קלאב' איז אנגעקומען שבת, בעפאר צוויי גרויסע קאנצערטן וואס זענען געפלאנט פארצוקומען אין תל אביב אינעם 'מנורה מבטחים' ארינע, דעם 4'טן און 7'טן נאוועמבער.

"איך האב פשוט געפילט אז איך דארף עפעס זאגן," האט ער ערקלערט פארוואס ער האט באשלאסן זיך אנצונעמען.

דער ערשטער קאנצערט, אין אן ארינע וואס קען ארייננעמען ביז 11,000 מענטשן, איז שוין כמעט אינגאנצן אויספארקויפט. דאס האט געפירט צו א צווייטע אויפטרעטונג, וואס ווערט אנגערופן "מיר וועלן ווידער טאנצן" (We Will Dance Again), און איז געווידמעט פאר די קרבנות פונעם 'נאווע' מוזיק פעסטיוואל און זייערע פאמיליעס.

די קאנצערטן קומען נאכדעם וואס ער האט ארויסגעגעבן א נייע ליד מיטן זעלבן נאמען, אלס א טריביוט פאר די קרבנות פון די נאווע אטאקע, וואו ער קריטיקירט אויך די באשולדיגונגען אז מדינת ישראל באגייט א 'דזשענאסייד' אין עזה. זינט דאס ליד איז ארויסגעקומען, זאגט ער, האבן פריינט אויפגעהערט צו רופן, קאנצערטן און קאלאבאראציעס זענען געווארן געקענסלט, און מען האט אים אפילו צוריקגעצויגן אן איינלאדונג צו א מעמאריאל סערוויס פון א פריינט.

דאס ליד האט אויך געברענגט פאדערונגען פאר ריפאנדס און רופן צו קענסלען זיין אויפטרעטונג ביי א יריד אין וואנקואווער. ער האט אבער שוין אין די פארגאנגענהייט אפגעווארפן בויקאט רופן, און ער איז יעצט פון די איינציגסטע גרויסע אינטערנאציאנאלע ארטיסטן וואס טרעטן אויף אין מדינת ישראל דורכאויס די מלחמה.

קריטיקירער, אריינגערעכנט שטיצער פון די אנטי-ישראל בויקאט באוועגונג, טענה'ן אז זיין קומען קיין תל אביב גיט א דעקונג פאר די מדינת ישראל רעגירונג, און אז זיין ליד נעמט אן איין-זייטיגע שטעלונג אין א קאמפליצירטן קאנפליקט. פון די אנדערע זייט, זען עס זיינע שטיצער אלס אן אקט פון סאלידאריטעט. אזוי אדער אזוי, ווערט ערווארטעט אז דער קאנצערט פונעם 7'טן נאוועמבער וועט זיין איינע פון די מערסט-גערעדטע קאנצערטן אין תל אביב דעם יאר.