פרישע קריזיס ביים איראן-פאקיסטאן גרעניץ: צענדליגע אויל טראקס שטעקן געבליבן אין איראנער רעפיינערי

אויל ליפערונגען וואס זענען באשטימט פאר פאקיסטאן פלאגן זיך מיט פרישע טראנספארטאציע שטרויכלונגען אין דרום איראן, נאכדעם וואס צענדליגע אנגעפילטע טענקער טראקס זענען געבליבן שטעקן און קענען נישט פארלאזן די 'באנדאר אבאס סטאר' אויל רעפיינערי.

לויט ווידעא קליפס און אינפארמאציע וואס צירקולירט פונעם אינדוסטריעלן ארט, קענען די טראק דרייווערס נישט באקומען די נויטיגע עקזיט פערמיטן און זיגלען וואס פעלט זיך אויס צו קענען אריבערפירן זייער פראכט קיין פאקיסטאן. די טראקס זענען געווען סקעדזשולד אריבערצוגיין די 'רימדאן' און 'פישין' בארדער רוטס. אין די ווידעאס קען מען זען לאנגע רייעס פון אויל טענקערס וואס זענען געפארקט אינעם רעפיינערי קאמפלעקס, ווארטנדיג אויף ערלויבעניש צו קענען פארזעצן זייער וועג.

די אומגעראכטענע פארהאלטונג האט אויפגעברענגט פראגעס צי די פראבלעם קומט פון אדמיניסטראטיווע באגרעניצונגען, קאמפליקאציעס ביים בארדער, אדער אנדערע לאגיסטישע אישוס. דערווייל איז נאכנישט דא קיין אפיציעלע ערקלערונג פארוואס די טראקס ווערן פארהאלטן.

די יעצטיגע אנטוויקלונג קומט אין א צייט וואס עס זענען שוין דא א רייע שטרויכלונגען אין די קאמערציאלע טראפיק צווישן איראן און פאקיסטאן, וואו בארדער רעסטריקציעס און טוישונגען אין אימפארט דאקומענטאציע האבן שוין פריער איבערגעלאזט אויל ליפערונגען און אנדערע קארגא געשטראנדעט.

אין אקטאבער האט פאקיסטאן סוספענדירט די קאמערציאלע טראפיק דורכ'ן 'גאבד-רימדאן' און 'טאפטאן' אריבערגאנג, אנגעבנדיג זיכערהייט און אנטי-שמוגלעריי זארגן, בעת איראנער באאמטע האבן באשולדיגט די פארהאלטונגען אויף טוישונגען אין פאקיסטאן'ס אימפארט פראצעדורן. כאטש א באגרעניצטע האנדל האט זיך שפעטער באנייט, צייגן באריכטן אז די רעסטריקציעס האבן ווייטער אפעקטירט די באוועגונג פון געוויסע שיפמענטס.

די פרישע פארהאלטונג פון די טענקערס קען שאפן נאך שוועריגקייטן פאר אויל עקספארטירער און טראנספארט אפעריטארס אויב די פארהאלטונגען וועלן אנהאלטן. עס בלייבט אבער אומקלאר צי די יעצטיגע סיטואציע איז א נייע איראנער עקספארט רעסטריקציע, אדער בלויז א פארזעצונג פון די פריערדיגע אדמיניסטראטיווע פראבלעמען ביים בארדער.