נייע אנקעטע צייגט דעמאקראטן פאראויס אין ניו יארק, טעג בעפאר די וואלן

א נייע 'מאריסט' אנקעטע צייגט אז די דעמאקראטן זענען באקוועם פאראויס אין ניו יארק, בלויז עטליכע טעג בעפאר די אלגעמיינע וואלן. צווישן די ווארשיינליכע וויילער, זאגן 56 פראצענט אז זיי וועלן שטיצן דעם דעמאקראטישן קאנגרעס קאנדידאט, אין פארגלייך צו 42 פראצענט פארן רעפובליקאנער - א חילוק פון 14 פראצענט אויפן אלגעמיינעם בולעטין. די אנקעטע איז דורכגעפירט געווארן צווישן אקטאבער 22 און 25, מיט א מארדזשין אוו עראר פון 3.9 פראצענט.

די זעלבע אנקעטע שטעלט גאווערנאר קעטי האקול פאראויס פון איר רעפובליקאנער קעגנער ברוס בלעיקמאן מיט 53 פראצענט קעגן 42 פראצענט צווישן די ווארשיינליכע וויילער. ווי אויך זאגן 71 פראצענט פון די וויילער אז זיי ערווארטן אז האקול וועט געווינען ווידער-ערוויילונג.

די ציפערן ווייזן אויך ווי שטארק פרעזידענט טראמפ שפילט א ראלע אין די יעצטיגע וואלן. 47 פראצענט פון די וויילער זאגן אז זייער שטימע פאר קאנגרעס איז הויפטזעכטליך א שטימע קעגן אים, בעת 18 פראצענט זאגן אז עס איז א שטימע אין שטיצע פון אים, און 34 פראצענט זאגן אז עס האט גארנישט צוטון מיט אים.

דאך זענען דא עטליכע ווארענונג צייכנס פאר די דעמאקראטן, וויבאלד די 'אינדעפענדענט' וויילער וואס גייען ווארשיינליך שטימען, נייגן מער צו די רעפובליקאנער זייט אויפן קאנגרעס בולעטין, מיט 51 פראצענט קעגן 45 פראצענט.

בלעיקמאן האט אפגעשלאגן די רעזולטאטן פון די אנקעטעס, באשולדיגנדיג די אנקעטע-נעמער אז זיי פרובירן צו אנטמוטיגן זיינע שטיצער. ער האט אנגעוויזן אז אן אנקעטע איז בלויז א בילד פון די יעצטיגע מיינונגען און נישט קיין פאראויסזאגונג אויף די ענדגילטיגע רעזולטאטן. צום סוף איז וואס ס'רעכנט זיך באמת די 'טוירנאוט' (וויפיל מענטשן קומען פאקטיש ארויס שטימען), און דער עכטער ענטפער וועט מען געוואויר ווערן דעם קומענדיגן נאוועמבער 3.