שפאנונג אין תימן: סאודיע באמבארדירט אויל פאסיליטי אין סאנא; כוטי רעבעלן סטראשען צוריקצושלאגן

לאנגע רייעס פון קארס האבן זיך געפארעמט אינדרויסן פון די גאז סטאנציעס איבער די כוטי-קאנטראלירטע הויפטשטאט סאנא, קורץ בעפאר סאודישע קריגס-עראפלאנען האבן באמבארדירט די 'אל סאבאהא' אויל פאסיליטי אויף די מערב זייט פון די שטאט. די לופט-אטאקעס זענען געקומען נאכדעם וואס די סאודיש-געפירטע קאאליציע האט ארויסגעגעבן אן עוואקואציע ווארענונג פאר ציווילע בירגער, וואס צייגט אויף א שארפע עסקאלאציע אינעם קאנפליקט.

איינוואוינער האבן זיך געאיילט אנצופילן זייערע טאנקן מיט גאז צוליב די פחד פון א מאנגל, שאפנדיג ריזיגע טראפיק און רייעס אויף די גאסן אין די שעה'ן בעפאר די אטאקע. די כוטי רעבעלן האבן נישט געשפעטיגט צו רעאגירן, און האבן געסטראשעט מיט א שווערע נקמה אקציע קעגן די הויפטקווארטירן פון די 'סאודי אראמקא' אויל פירמע אין דאמאם, איר רעפיינערי אין ריאד, ווי אויך די 'קינג כאליד' אינטערנאציאנאלע עירפארט - די זעלבע עירפארט וואס איז שוין געווארן אטאקירט עטליכע טעג פריער אין א טויטליכע אנגריף. די כוטי פירער האבן קלארגעשטעלט אז יעדע פרישע אטאקע אויף סאנא וועט ברענגען א שווערע ענטפער טיף אינעם סאודישן טעריטאריע.

די כוטי-קאנטראלירטע אויל פירמע אין תימן האט ארויסגעשטעלט א סטעיטמענט אז די ציל-געטראפענע פאסיליטי האט בכלל נישט געהאט קיין אויל פראדוקטן אין די צייט פון די אטאקע, און זיי האבן פארזיכערט אז די סופלייען פאר די הויפטשטאט זענען פארזיכערט. זיי האבן געבעטן דעם ציבור נישט צו פאניקן און צוגעגעבן אז מען האט שוין אונטערגענומען שריט צו פארזיכערן אז די אויל דיסטריבוציע זאל אנגיין ווי געהעריג. אבער טראץ די בארואיגונגען, האט די פלוצלינגדיגע ערשיינונג פון די לאנגע רייעס ביי די געז סטעישאנס ארויסגעוויזן די גרויסע אנגסט צווישן די לאקאלע איינוואוינער איבער מעגליכע שטרורונגען אין זייער טעגליכן לעבן.

פון זייער זייט האבן די סאודישע קרעפטן אנגערופן די אפעראציע אלס א "פרעציזע רעאקציע" נאך די לעצטיגע מיסיל און דראון אטאקעס דורך די כוטיס, וואס האט אומגעברענגט מער ווי א צענדליג מענטשן און פארוואונדעט הונדערטער ביי די הויפט עירפארט אין ריאד.

די יעצטיגע אויסטויש פון אטאקעס און סטראשונגען הייבט פרישע זארגן אז דער קאנפליקט קען זיך נאך מער אויסברייטערן צו קריטישע ענערגיע און ציווילע צילן. ווי עס קוקט אויס פון די בילדער פון די גאז רייעס אין סאנא און די דירעקטע סטראשונגען קעגן 'אראמקא', ריקט זיך די מלחמה אריין אין א פאזע וואס צילט די עקאנאמישע און טעגליכע לעבנס-געברויכן אויף ביידע זייטן פונעם גרעניץ.