מדינת ישראל פרעמיער מיניסטער בנימין נתניהו האט דעם וויקענד אפגעשטאט א באזוך אין די אשדוד נעיווי באזע, אינאיינעם מיט'ן פארטיידיגונגס מיניסטער ישראל כ"ץ, וואו ער האט דעקלערט אז דער ים איז געווארן פונקט אזוי געפארפול ווי סיי וועלכע אנדערע פראנט אויף דער יבשה.

"מיר ווייסן אז דער קאמף אויפ'ן וואסער איז פאקטיש פארוואנדלט געווארן אין אן אינטערנאציאנאלע שלאכטפעלד," האט נתניהו געזאגט. "מען זעט עס ביים הארמוז דורכגאס, מען זעט עס פארשטייט זיך ביים באב על-מאנדעב, און אונזערע פיינט ווילן סטראשען אונזערע וואסערן אינעם מיטלענדישן ים, אונזערע פארטן, און אונזער שיפס-פארקער. פארשטייט זיך אז מיר וועלן דאס נישט צולאזן."

דורכאויס דעם באזוך האבן נתניהו און כ"ץ באקומען א ברייטע איבערזיכט פון די נעיווי קאמאנדירן איבער די טעגליכע זיכערהייט פאטראלן און די סכנות וואס לויערן אינעם דרום סעקטאר. דערנאך האבן זיי מיטגעהאלטן א לעבעדיגע דעמאנסטראציע פון די פארשידענע קאמפס-מיטלען וואס ווערן באנוצט צו באשיצן און אטאקירן אויפ'ן וואסער.

נתניהו האט זיך נישט אפגעשטעלט ביי ווארענונגען, נאר האט אויך ארויסגעלייגט א פלאן פאר א מאסיווע פארברייטערונג פונעם פלאטע. "א זעקסטע סובמארין איז שוין אנגעקומען אין לאנד, און מען וויל נאך," האט ער געזאגט, באציענדיג זיך צום נייעם 'דראקאן' סובמארין וואס איז די גרעסטע וואס די מדינה האט נאר אמאל פארמאגט. "עס קומען נאך שיפן און נאך אנדערע מיטלען וואס איך גיי נישט דא אריינגיין אין קיין דעטאלן. אבער איין זאך קען איך אייך זאגן: סיי העכער'ן וואסער און סיי אונטער'ן וואסער, פלאן איך אז מדינת ישראל זאל זיין פון די פירנדע אין דער וועלט אין דעם סארט קאמף. מיר וועלן באשיצן די מדינה אויך פונעם ים."

דאס איז א מערקווירדיגע טויש אין די סטראטעגיע פונעם מיליטער, וואס איז היסטאריש געווען מער קאנצענטרירט אויף די עיר פארס און ערד-קרעפטן, בעת די נעיווי איז אלץ געווען עטוואס אן אונטערשטע פריאריטעט. דאס פארוואנדלען די נעיווי אין א גלאבאלע מאכט צייגט אויף אן ערנסטע טויש אין וויאזוי דאס לאנד קוקט אן איר אייגענע פארטיידיגונג.