א נייע דראמאטישע ווידעא איז ארויסגעקומען וואס צייגט דעם פונקטליכן מאמענט ווען א קליינע 'סעסנע 150' פליגער האט זיך צוזאמגעשטויסן מיט א פענסילוועניע סטעיט פאליציי העליקאפטער ביים 'קארלייל עירפארט' דעם פארגאנגענעם אוגוסט 19. דער קראך האט איבערגעלאזט דעם פילאט פונעם פליגער טויט, און צוויי סטעיט טרופערס פארוואונדעט.

די רעקארדירונג, וואס איז געכאפט געווארן פון א האנגאר, צייגט ווי דער פליגער פארקריכט אויף רעכטס אינמיטן זיך גרייטן צו לאנדן, און קראכט אריין אינעם העליקאפטער פון אונטן. דער צוזאמענשטויס האט פאראורזאכט אז ביידע זאלן אראפקראכן נעבן די ראנוועי, איבערלאזנדיג חורבות צעווארפן איבערן גאנצן עירפארט.

דער פילאט פונעם פליגער איז אידענטיפיצירט געווארן אלס דער 57-יעריגער פאול וויליאם סאקאלאסקי פון הערשי, וועלכער איז אומגעקומען אויפ'ן ארט. די צוויי טרופערס וואס זענען געווען אויפ'ן העליקאפטער, קארפארעל ברייס קארמאן און טרופער דזשעיסאן מילס, האבן איבערגעלעבט דעם עקסידענט און זענען אפגעפירט געווארן אין שפיטאל פאר באהאנדלונגען, און איינער פון זיי איז שוין באריכטעט ארויסגעלאזט געווארן.

דער העליקאפטער האט פונקט דורכגעפירט נידריגע טרעינינג איבונגען ווען דער עקסידענט האט פאסירט, וואס מאכט די גאנצע פאסירונג נאך מער קאמפליצירט, קומענדיג אין א צייט-אפשניט פון בלויז עטליכע סעקונדעס. דער העליקאפטער האט געליטן קאטאסטראפאלע שאדנס, אריינגערעכנט דאס פארלירן די פראפעלערס און די אונטערשטע טייל, בעפאר'ן פאלן אויף די זייט.

די נייע ווידעא גיט א קלארן בליק אויף די לעצטע סעקונדעס פאר'ן קראך, אבער אינוועסטיגעיטארס האבן נאכנישט פעסטגעשטעלט פארוואס דער פליגער האט פלוצלינג געטוישט זיין ריכטונג. די 'עף-עי-עי' (FAA) און די 'ען-טי-עס-בי' (NTSB) פירן יעצט אן אן אויספארשונג איבער די אומשטענדן פונעם קראך, און ביז די אויספארשונג איז פארטיג קען מען נאכנישט מיט זיכערקייט זאגן וואס האט געפירט דערצו.

די שוידערליכע בילדער האבן אויפגעוועקט א פרישע אויפמערקזאמקייט צו די ריזיקעס וואס פליגערס האבן ווען זיי פליען אזוי נאנט איינער צום צווייטן ביי עירפארטס, בפרט ווען א העליקאפטער מאכט טרעינינג נעבן אן אקטיווע ראנוועי. וואס האט אויסגעזען ווי א רוטינע לאנדונג איז פלוצלינג פארוואנדלט געווארן אין א טויטליכע עקסידענט, וואס ברענגט ארויף די הויפט פראגע וואס די אויספארשער וועלן דארפן ענטפערן: פארוואס האט דער פליגער אריינגעצויגן אינעם העליקאפטער'ס וועג מיט אזוי ווייניג צייט פאר סיי וועלכע פון זיי זיך צו ראטעווען פונעם קראך?

מען ערווארט אז די אויספארשונג וועט צושטעלן א קלארע בילד פון וואס פונקטליך עס האט פאסירט און צי מען וואלט עס געקענט פארמיידן.