ניו זשערסי באאמטע האבן געעפנט אן אויספארשונג איבער א מעגליכע אינשורענס פראד קעיס, נאכדעם וואס א שווערע שטורעם איבערן וויקענד האט פארפלייצט א נידריגע פארקינג לאט אויף ריווער ראוד אין עדזשוואטער.

ווידיאו רעקארדירונגען פון שבת האבן געוויזן עטליכע קארס וואס זענען שוין געווען אונטער וואסער, אבער פרישע ווידיאוס פון מאנטאג האבן אנטפלעקט אז עס זענען צוגעקומען נאך קארס וואס זענען פריער נישט דארט געווען. צווישן די נייע קארס זענען געווען א טייערע בי-עם-דאבליו 7 סיריעס און א מערצעדעס-בענז S580 וואס קאסט ארום 130,000 דאלאר.

דער לאקאלער אדמיניסטראטאר, גרעג פראנז, האט געזאגט אז עס זעט אויס ווי מענטשן האבן אריינגעטריבן אדער אריינגעשטיפט זייערע קארס אינעם וואסער נאכדעם וואס די פארפלייצונג האט זיך שוין אנגעהויבן. "די קארס זענען נישט אנגעקומען אין דעם וואסער בטעות," האט פראנז געזאגט, בשעת די פאליציי האט אנגעהויבן איבערצוקוקן די ווידיאוס.

לאקאלע אינסטאנצן און די פראד אפטיילונג פונעם ניו זשערסי אטוירני דזשענעראל קוקן איצט איבער די באווייזן. דער פארקינג לאט איז א באקאנטע פלאץ נעבן דעם האדסאן טייך וואס ווערט אפט פארפלייצט, און ארטיגע איינוואוינער ווייסן זיך צו האלטן ווייט פון דארט בשעת א שווערע שטורעם. די אויספארשער זאגן אז דאס פלוצלינגדיגע ערשיינונג פון אזעלכע טייערע קארס ברענגט ארויף קלארע פארדאכטן אז מען האט דאס געטאן דירעקט כדי צו קענען פיילן פאלשע אינשורענס קלעימס.

פראנז האט געשאצט אז אזעלכע סארט אינשורענס פראד לייגט צו בערך 900 דאלאר צום פרייז פאר יעדע פארזיכערטע פערזאן אין עדזשוואטער, וואס לייגט צו א פרעשור צו די שוין-אזוי-הויכע קאר אינשורענס פרייזן אין ניו זשערסי. געווענליך קען די פאמפ אינעם לאט שנעל ארויסציען דאס וואסער פון א נארמאלע רעגן, אבער א הויכע פלייץ פונעם האדסאן האט אפגעשטעלט דאס וואסער פון ארויסגיין און פארלענגערט די פארפלייצונג.

באאמטע האבן אונטערגעשטראכן אז אזעלכע פראד קעיסעס טוען שאדן פאר יעדע נארמאלע דרייווער דורכן ארויפטרייבן די פרייזן איבערן גאנצן סטעיט. די פאליציי ארבעט ווייטער צו אידענטיפיצירן די וואס האבן אריינגערוקט זייערע קארס אינעם וואסער. עס זענען נישט געווען קיין פארוואונדעטע אינעם אינצידענט, אבער די אויספארשונג גייט אן אין פולן שוואונג.