די ניו יארקער פאליציי דעפארטמענט (NYPD) ארבעט פלייסיג צו כאפן א גרופע בורגלערס וועלכע זענען אנגעבליך פאראנטווארטליך פאר א רייע איינברוכן אין פארמאסיס איבער גאנץ ניו יארק סיטי, איבערלאזנדיג אונטער זיך צובראכענע טירן און ליידיגע קעש-רעדזשיסטערס. לויט די פאליציי, האבן די גנבים שוין באוויזן צו גנב'ענען קעש און מעדיצינען אין ווערד פון איבער 60,000 דאלאר.

די אויספארשער געבן איבער אז ביז יעצט זענען שוין 8 באזונדערע פארמאסיס אין אלע פינף באראס געווארן א קרבן צו די באנדע. די גנבים רייניגן אויס די סעיפס און קעש רעדזשיסטערס, און נעמען אויך מיט טייערע פרעסקריפשאן מעדיצינען פון די פאליצעס. דעטעקטיווס זאגן אז די גרופע פירט געווענליך דורך זייערע גניבות אין די פריע פארטאגס שעה'ן, ווען זיי ברעכן אויף די פראנט טירן אדער שלעסער, און אין עטליכע פעלער האבן זיי זיך באנוצט מיט א 'קראובאר' אויפצוברעכן די טיר.

אויף סעקיוריטי קאמערע ווידעא וואס איז פארעפנטליכט געווארן, קען מען זען די פארדעכטיגטע אנגעטון מיט קאפצן (הוּדס) זיך דרייען געשווינד נעבן א געטאוועי קאר און ארבעטן אויפצוברעכן די פארמאסי טירן, ווי אויך זעט מען בילדער פון די שווערע שאדנס וואס זיי האבן איבערגעלאזט ביי די געשעפטן נאך די איבערנאכט איינברוכן.

די יעצטיגע כוואליע פון גניבות איז ליידער א באקאנטע ערשיינונג פאר אייגנטומער פון פריוואטע לאקאלע פארמאסיס איבער די שטאט. זיי זאגן אז זיי ווערן כסדר געצילט דורך אזעלכע באנדעס וואס זוכן א גרינגע ציל פאר קעש און נארקאטיקס אין די שטילע פארטאגס שעה'ן ווען קיינער דרייט זיך נישט אויפן גאס. די קלענערע פריוואטע געשעפטן זענען א ספעציעלע ציל, וויבאלד רוב פון זיי קענען זיך נישט ערלויבן די טייערע באוואפנטע סעקיוריטי אדער שטארקע אייזערנע טויערן וואס די גרויסע טשעין-פארמאסיס פארמאגן אפצושרעקן גנבים.

די פאליציי האט אין די לעצטע מאנאטן שוין עטליכע מאל געבעטן די הילף פונעם פובליק צו אידענטיפיצירן די גרופעס, וואס צייגט ווי אפט די סארט גניבות פאסירן. דערווייל בעט די NYPD נאכאמאל אז ווער עס האט סיי וואספארא אינפארמאציע איבער די איינברוכן זאל זיך פארבינדן מיט די 'קריים סטאפערס' האטליין, האפנדיג אז א טיפ פונעם פובליק וועט העלפן אפשטעלן די באנדע בעפאר נאך א פארמאסי ווערט זייער קומענדיגע ציל.