עף-בי-איי ארעסטירט 21-יעריגן אין פענסילוועניע וועלכער האט געפלאנט אן אייסיס טעראר אטאקע

די עף-בי-איי האט ארעסטירט א 21-יעריגן יוגנטליכן פון וואלענסיע אין באטלער קאונטי, פענסילוועניע, אויף קלאגעס אז ער האט זיך געגרייט דורכצופירן א בלוטיגע טעראר אטאקע אין שטיצע פון די טעראר גרופע 'אייסיס'. דער פארדעכטיגטער, דזשאנאטאן האנטער קרעמער, איז ארעסטירט געווארן דורכאויס דעם וויקענד נאכדעם וואס אגענטן האבן אים אפגעשטעלט אינדערצייט וואס ער האט זיך צוריקגעקערט צו זיין האטעל צימער מיט רייפל מעגאזינען און אמוניציע.

ביי א שפעטערדיגע זוכונג אין זיין צימער האבן די פעדעראלע אגענטן געפונען א סעמי-אויטאמאטישע רייפל, נאך מעגאזינען, ארום 190 קוילן, און אנדערע פארדעכטיגטע ארטיקלען.

דער עף-בי-איי דירעקטאר קעש פאטעל האט איבערגעגעבן אז דער פארשוין האט לויט די באשולדיגונגען געפלאנט א געוואלדטאטן אטאקע אין שטיצע פון אייסיס. ער האט אנגעוויזן אז קרעמער איז געווען פארמישט אין לייענען און פארשפרייטן אנליין פראפאגאנדע, האט אנטוויקלט פלענער פאר אן אטאקע, זיך באנוצט מיט עקסטרעמיסטישע רעטאריק, און איינגעהאנדלט וואפן פאר דעם צוועק.

פעדעראלע אויטאריטעטן האבן אנגעקלאגט קרעמער מיט'ן ערהאלטן א פייער-וואפן און אמוניציע מיט'ן וויסן אדער האבן א סיבה צו גלייבן אז זיי וועלן גענוצט ווערן דורכצופירן א פעדעראלע טעראר פארברעכן. פראקורארן האבן פארלאנגט פונעם ריכטער אז ער זאל פארהאלטן ווערן אונטער ארעסט אן קיין בעיל, אנגעבנדיג אז ער שטעלט אן ערנסטע געפאר פאר די קאמיוניטי.

באאמטע האבן אראפגעלייגט דעם קעיס אלס נאך א ביישפיל ווי די ביורא קומט אויף די שפורן פון טעראר סטראשונגען און שטעלט זיי אפ בעפאר זיי קענען פאראורזאכן שאדן. דער ארעסט ברענגט ווידער ארויף פראגעס איבער וויאזוי עקסטרעמיסטן ווערן ראדיקאליזירט אויפן אינטערנעט און וועלכע ווייטערדיגע שריט מען דארף נעמען צו אויפכאפן ענליכע פלענער אין א פריע פאזע.