א שפאנישער נייעס רעפארטער האט באקומען א פראקטישע - און גאר נאסע - דעמאנסטראציע פון די געפארן איבער וועלכע ער האט געהאלטן אינמיטן ווארענען די צוזעער.

דער רעפארטער, סערדזשיאו אוועדזשערא, איז געשטאנען דעם דאנערשטאג (אקטאבער 22) אויף א פראמענאד ביים ברעג ים אין אנדארא, שפאניע, און געגעבן א לייוו באריכט אויף די לאקאלע 'ETB2' סטאנציע. אינמיטן זיין רעפארטאזש האט ער גערעדט איבער די ווילדע כוואליעס און די געפאר וואס דאס שטעלט פאר פוסגייער צוליב אן אונטערקומענדיגע שטורעם. עטליכע סעקונדעס שפעטער האט דער ים אים געגעבן א דראמאטישן ענטפער, ווען א ריזיגע כוואליע האט זיך איבערגעריסן דעם מויער און אים אראפגעקלאפט אינאיינעם מיט די קאמערע-פרוי, ראקעל, איבערלאזנדיג ביידע אינגאנצן נאס. דאס וואסער האט אינגאנצן איבערגעדעקט דעם קאמערע לינז און אפגעהאקט דעם לייוו בראדקעסט פאר א קורצע צייט.

צוריק אין די סטודיאו זענען די פראגראם אנפירער געווארן שטארק דערשראקן, וויבאלד פאר עטליכע אנגעצויגענע מינוטן האבן זיי נישט געהאט קיין אנונג וואס עס האט פאסירט מיט זייערע קאלעגן. די שטימונג האט זיך אבער בארואיגט ווי נאר מען האט באשטעטיגט אז סיי דער רעפארטער און סיי די קאמערע-פרוי זענען ברוך השם אומגעשעדיגט און זענען בלויז אפגעקומען מיט שרעק.

דער אינצידענט האט פאסירט קורץ בעפאר די וועטער אומשטענדן האבן זיך געדארפט נאך מער פארערגערן דעם פרייטאג, ווען דער מעכטיגער 'אוסטין' שטורעם האט אריינגעלייגט דעם גאנצן בארטן-זאנע אין א הויכע אלערט. די לאקאלע אויטאריטעטן האבן שוין פון פריער ארויסגעגעבן שטרענגע ווארענונגען איבער די מעכטיגע ווינטן און ווילדע כוואליעס.

דער קורצער קליפ פונעם אינצידענט איז געווארן גאר וויירעל אויף די סאשעל מידיא פלאטפארמעס, דינענדיג אלס א לעבעדיגע דערמאנונג ווי שנעל און אומפאררעכנליך דער ים קען ווערן ווען א שטורעם בלאזט זיך אן.