טראמפ ווארנט איראן ביי א קאמפיין ראלי אין אלאסקא; אמעריקאנער מיליטער פארניכטעט איראנער שפיאנאזש שיפל

פרעזידענט טראמפ זאגט צו שווערע צייטן פאר איראן. ביי א קאמפיין ראלי וואס איז פארגעקומען דינסטאג אין וואסילא, אלאסקא, האט דער פרעזידענט געזאגט פאר זיינע שטיצער: "ווארטס נאר צו און זעט וואס מיר גייען טון פאר איראן, מיר גייען זיי גוט אנלערנען." טראמפ האט קלארגעשטעלט אז די אמעריקאנער בלאקאדע בלייבט אין פולן קראפט, און אז אויל פליסט דורכן הארמוז אדורכגאס אין רעקארד נומערן, אנגעבנדיג אז 22 מיליאן פאסן אויל זענען אריבערגעפירט געווארן אין איין איינציגע נאכט.

אבער דא קומט א קליינע כאפ: טראמפ האט אויך עפנטליך געזאגט אז אמעריקע וועט נישט אטאקירן איראן בעפאר די נאוועמבער 3 מידטוירם עלעקשאנס. דאס קומט אין די זעלבע צייט וואס 'אקסיאס' האט באריכטעט אז טראמפ און דער מדינת ישראל פרעמיער מיניסטער בנימין נתניהו האבן ארומגערעדט איבער א פרישע גרויסע מיליטערישע אפעראציע. די געמישטע סיגנאלן לאזן יעדן אין אומקלארקייט צי דעם פרעזידענט'ס שארפע רעטאריק איז אן אמת'ע ווארענונג אדער בלויז טייל פון זיין קאמפיין סטראטעגיע. דערווייל קוקט אויס ווי דער מצב אויפן וואסער איז פיל מער אנגעצויגן ווי טראמפ לייגט עס אראפ.

לויט א באריכט פון 'רויטערס', טוישט איראן אירע טאקטיקן. אן אמעריקאנער מיליטערישער באאמטער האט באשטעטיגט אז נאכדעם וואס אמעריקאנער אטאקעס האבן פארניכטעט א גרויס טייל פון איראן'ס ראדאר מעגליכקייטן, האט די רעוואלוציאנערע גווארדיע אנגעהויבן נוצן אומבאוואפנטע שפיאנען אין קליינע שיפלעך צו אידענטיפיצירן צילן, אריינגערעכנט אמעריקאנער נעיווי שיפן. דער באאמטער האט דערציילט אז אמעריקאנער קרעפטן האבן לעצטנס קאנפראנטירט אזא סארט שפיאנאזש שיפל. זיי האבן באפוילן די פאסאזשירן אראפצוגיין דערפון און דערנאך האבן זיי עס אינגאנצן פארניכטעט, אן קיין פארוואונדעטע.

צוויי הויכראנגיקע איראנער באאמטע האבן געזאגט פאר רויטערס אז דער נייער צוגאנג איז געצילט צו האלטן די אויל פרייזן הויך און צו האבן אן איינפלוס אויף די אמעריקאנער עלעקשאנס. דאטא פון שיפס-קאמפאניס צייגט אז די אטאקעס פארברייטערן זיך ארויס פונעם אדורכגאס צו די וואסערן נעבן קאטאר און די פאראייניגטע אראבישע עמיראטן (UAE), ווען די UKMTO האט שוין רעקארדירט 24 ווארענונגען דעם יעצטיגן חודש.

די אנגעצויגנקייט באגרעניצט זיך נישט נאר צום ים. סאודי אראביע און די הוטי רעבעלן טוישן זיך אויף מיט פרישע אטאקעס אין די פארשארפטע מלחמה אין תימן, וואס ברענגט ארויף זארגן אז דער קאנפליקט קען זיך פארשפרייטן איבערן גאנצן ראיאן. מיט די אויל פרייזן, שיפס-רוטעס און די גרויסע עלעקשאנס אויפן טיש, קענען די קומענדיגע פאר וואכן זיין גאר קריטיש און אנטשיידנד.