א ריזיגע קאנטעינער שיף, וועלכע האט זיך ארויסגעלאזט פון מדינת ישראל אויפ'ן וועג קיין רומעניע, איז געזונקען אין די מערב טייל פון די שווארצע ים, נאכדעם וואס זי איז געווארן אטאקירט דורך עטליכע מאריטים (ים) דראונס נעבן די בולגארישע ברעגעס, לויט באריכטן פון לאקאלע אויטאריטעטן און מידיא קוועלער.

א ווידעא וואס איז פארעפנטליכט געווארן דורך די בולגארישע נייעס אגענטור 'Maritime.bg' צייגט ווי א ים-דראון דערנענטערט זיך צו די שיף, וועלכע טראגט דעם נאמען 'Contship Jet' און פארט אונטער די פאן פון ליבעריע, קורץ בעפאר זי ווערט געטראפן.

דער בולגארישער פארטיידיגונגס מיניסטער האט איבערגעגעבן אז דריי דראונס האבן אריינגעקראכט אין די שיף ארום האלבן טאג, בערך 20 נאטישע מייל פונעם ברעג נעבן 'קעיפ קאליאקרא', וואס געפינט זיך אין בולגאריע'ס עקסלוסיווע עקאנאמישע זאנע. בחסדי השם זענען אלע 18 מאנשאפט מיטגלידער אויף די שיף געראטעוועט געווארן דורך די בולגארישע נעיווי און גרעניץ פאליציי, און זענען אפגעפירט געווארן אין א גוטן צושטאנד קיין ווארנא, אן קיין פאטאליטעטן. שפעטער ביינאכט, ארום האלבער נאכט, איז די שיף אינגאנצן אונטערגעגאנגען, פארוואנדלנדיג דעם אינצידענט אין אן ערנסטע קריזיס מיט א קאמערציאלע שיף וואס טראגט שעדליכע מאטעריאלן.

באריכטן צייגן אן אז די שיף, וואס ווערט אפערירט דורך די מדינת ישראל-פארבונדענע שיפינג פירמע 'צים' (ZIM), האט געטראגן אויף זיך ארום 421 קאנטעינערס אנגעפילט מיט פארשידענע סחורות, אריינגערעכנט ליטיום-איאן באטעריעס, שעדליכע פליסיגקייטן און עסידס. לויט די אינפארמאציע, זענען דא מער ווי 20 קאנטעינערס וואס שווימען יעצט ארום פריי אויפ'ן וואסער, וואס האט ארויסגערופן גרויסע זארג איבער א מעגליכע ענווייראמענטאלע קאטאסטראפע און א געפאר פאר אנדערע שיפן אין די געגנט.

בולגארישע באאמטע האבן זיך פארענטפערט אז לעגאלע רעסטריקציעס און שווערע וועטער אומשטענדן האבן זיי צוריקגעהאלטן פון אראפשיסן די דראונס בעפאר די אטאקע, בעת א פראנצויזישע רעקאנאסענס פליגער האט מיטגעהאלטן און מאניטארירט דעם גאנצן אינצידענט פון דער לופטן.

דערווייל האט נאך קיין שום גרופע אדער לאנד נישט גענומען אפיציעלע פאראנטווארטליכקייט אויף די אטאקע. כאטש עס איז דא א פארדאכט אז דאס האט א פארבינדונג צו רוסלאנד'ס ברייטערע קאמפיין קעגן קאמערציאלע שיפן אין די שווארצע ים, איז עס דערווייל נישט באשטעטיגט געווארן.

דער אינצידענט ברענגט נאכאמאל ארויס די וואקסנדע סכנות מיט וואס קאמערציאלע שיפן טוען זיך פלאגן אין דעם ראיאן צוליב די אנגייענדע רוסלאנד-אוקראינע מלחמה, וואו ים-דראונס שטעלן א דירעקטע געפאר פאר ציווילע מאנשאפטן, שטערן די גלאבאלע שיפינג רוטס, און קענען פירן צו שרעקליכע קאטאסטראפעס ווען עס קומט צו שעדליכע קארגא.