דראמאטישע סצענע: ריזיגער לופטהאנזא פליגער קוים אויסגעמיטן א קראך ביים לאנדן אין לאס אנדזשעלעס

א ריזיגער לופטהאנזא באואינג 747-8 פליגער איז געקומען בלויז אינטשעס נאנט פון א קראך, ווען די אונטערשטע טייל פונעם פליגער האט כמעט אנגעקלאפט אינעם ראנוועי, בעת די פיילאטס האבן פלוצלינג אפגעבראכן א לאנדונג אינעם לאס אנדזשעלעס אינטערנאציאנאלן עירפארט (LAX) דעם 10'טן אקטאבער. די דראמאטישע מאמענט איז אויפגעכאפט געווארן אויף ווידעא און האט זיך בליץ-שנעל פארשפרייט איבעראל.

פלייט LH456, וועלכע איז געקומען צופליען פון פראנקפורט, דייטשלאנד, האט שוין געהאט אראפגעשטעלט די הויפט רעדער אויפ'ן ראנוועי 24R, ווען די פיילאטס האבן פלוצלינג באשלאסן צו מאכן א "גאו-עראונד" און צוריק ארויפציען דעם פליגער אין די לופטן. דער לאנגער פליגער האט זיך אויפגעהויבן גאר שארף, וואס האט געברענגט דעם וויידל פונעם פליגער געפערליך נאנט צום ערד. ברוך השם האט דער פליגער זיך סוקסעספול געהויבן, און נאכ'ן ארומפליען העכער'ן עירפארט פאר ארום 15 מינוט, האבן זיי געמאכט א צווייטע, רואיגע לאנדונג. קיינער פון די פאסאזשירן אדער מאנשאפט זענען נישט פארוואונדעט געווארן, און עס איז נישט באריכטעט געווארן קיין שום שאדן צום פליגער.

די עירליין 'לופטהאנזא' האט ארויסגעגעבן א סטעיטמענט באשטעטיגנדיג אז דער מאנעווער איז א סטאנדארטע און גוט-איינגעחזר'טע זיכערהייט פראצעדור, אונטערשטרייכנדיג אז די זיכערהייט פון די פאסאזשירן איז ביי זיי די העכסטע פריאריטעט.

עוויעישאן עקספערטן ווייזן אן אז "גאו-עראונדס" זענען א רוטינע טייל פון פיילאט טרעינינג פונקט פאר אזעלכע פעלער, אבער די סצענע ווי א מאסיווער פיר-מאטארן דזשאמבא פליגער קראצט כמעט אפ דעם ראנוועי האט איבערגעשראקן די צושויער וואס האבן מיטגעהאלטן די לייוו-סטרים.

דער באשלוס פלוצלינג זיך צו הייבן איז געקומען נאכדעם וואס דער פליגער איז געשוועבט אין די לופטן אביסל צו לאנג בעפארן טאטש-דאון, וואס האט געפירט דערצו אז זיי זענען שוין געווען צו ווייט אריין אינעם ראנוועי און האבן געמוזט מאכן דעם שארפן הייב. די עקספערטן לייגן צו אז צוליב די אויסטערלישע לענג פונעם 747-8 פליגער, איז גאר קריטיש און שווער אויסצומיידן א "טעיל סטרייק" (א קראך פונעם וויידל) ווען מען מאכט אזעלכע שארפע מאנעווערעס ביי א נידעריגע הייך.

למעשה האט די סוקסעספולע ענדע אויפגעוויזן די שנעלע און ריכטיגע באשלוסן פון די פיילאטס. די רייזנדע אויפ'ן פלייט האבן בלויז מיטגעמאכט א קורצע פארהאלטונג בעפאר דער פליגער איז ווידער געווען גרייט זיך ארויסצולאזן אויפ'ן וועג צוריק קיין פראנקפורט.