אומגעווענליכע טאקטיק: אוקריינע נוצט אלטע טרענירונג פליגערס אראפצושיסן רוסישע דראונס מיט פשוט'ע ביקסן

די 11'טע ארמיי אוויאציע בריגאדע פון אוקריינע, באקאנט אלס די "כערסאן בריגאדע", האט ארויסגעגעבן א נייע ווידעאו קליפ וואס צייגט ווי זייערע 'יאק-52' פראפעלער פליגערס כאפן אויף און שיסן אראפ רוסישע אטאקע דראונס אינמיטן די אנגייענדע קריג.

די דראמאטישע בילדער צייגן ווי די אוקריינישע פילאטן יאגן נאך די קליינע דראונס און נוצן פשוט'ע רייפלס און שאטגאנס דירעקט פונעם פליגער אין א פרואוו צו פארניכטן די קומענדיגע געפארן. אין עטליכע פעלער זעט מען ווי די דראונס רייסן אויף אין דער לופטן אדער קראכן צו דער ערד נאכן ווערן געטראפן.

די אפעראציעס צייגן אן אומגעווענליכע און קריעטיווע צוגאנג זיך צו ספראווען מיט לופט געפארן. די 'יאק-52' פליגערס זענען ארגינעל געבויט געווארן אין די סאוועטישע צייטן אלס טרענירונג פליגערס, אבער ווערן יעצט גענוצט פאר א ציל פיל ווייטער פון זייער ארגינעלע באשטימונג. אנשטאט זיך צו פארלאזן בלויז אויף טייערע עיר-דעפענס סיסטעמען, טוען די אוקריינישע קרעפטן אדאפטירן עוועילעבל אוויאציע פלאטפארמעס צו העלפן אדרעסירן די וואקסנדע פראבלעם פון די ביליגע רוסישע אטאקע דראונס.

די טאקטיק שטרייכט אונטער אוקריינע'ס כסדר'דיגע באמיאונגען צו טרעפן פלעקסיבל און ביליגע וועגן צו באשיצן זייער לופט-רוים, בעת רוסישע דראון אטאקעס בלייבן א ערנסטע דאגה אויפן שלאכטפעלד. קליינע אטאקע דראונס קענען שטעלן א געפאר פאר מיליטערישע פאזיציעס, אינפראסטרוקטור, און אנדערע צילן, וואס לייגט א פרעשור אויף די טראדיציאנאלע עיר-דעפענס נעצן.

דאס נוצן לייכטע פראפעלער פליגערס פאר דעם צוועק שטעלט צו נאך א שיכט פון שוץ, כאטש עס ווענדט זיך אין די אומשטענדן און די סארט דראונס וואס מען צילט. די נייע ווידעאו גיט א בליק וויאזוי אוקריינישע אוויאציע איינהייטן עקספערימענטירן מיט אלטע עקוויפמענט. כאטש די 'יאק-52' פליגערס קענען נישט אינגאנצן איבערנעמען די פלאץ פון פארגעשריטענע ראדאר נעצן אדער מאדערנע מיסיל סיסטעמען, צייגט עס אבער וויאזוי אלטע פלאטפארמעס קענען ווערן צוגעפאסט צו טרעפן א לייזונג פאר נייע מיליטערישע טשאלענדזשעס.