תימן: רעגירונג קרעפטן פארשטארקן דראון אטאקעס קעגן די כותי רעבעלן אויפן פראנט

די תימן'ער רעגירונג קרעפטן האבן לעצטנס שטארק פארמערט זייערע אטאקעס קעגן די כותי רעבעלן, נוצנדיג דראונס צו צילן קעמפער, טרענטשעס (גראבנס) און באפעסטיגטע פאזיציעס איבער עטליכע פראנט ליניעס. פרישע מיליטערישע ווידעא קליפס וואס זענען ארויסגעגעבן געווארן דורך די תימן'ער קרעפטן צייגן ווי די דראונס זוכן אויף צילן און ווארפן אראפ באמבעס דירעקט אויף די כותי פאזיציעס. דאס צייגט אן א באדייטנדע אנטוויקלונג אינעם קאנפליקט, וואו דראונס זענען געווארן א הויפט געווער פאר ביידע זייטן.

די רעגירונג זאגט אז אין די לעצטע אפעראציעס האבן זייערע דראונס געצילט כותי פארזאמלונגען, טונעלן, באזעס און מיליטערישע פאזיציעס וואס זענען געמאכט צו באשיצן די רעבעלן און זייערע געווער. דאס אטאקירן פון די לופטן גיט פאר די רעגירונג א פרישע מעגליכקייט צו גרייכן צילן וואס זענען שווער צו אטאקירן פון דער ערד מיט געווענליכע וואפן.

די נייע דראון קאמפיין קומט נאך א שארפע פארמערונג אין די שלאכטן צווישן די אינטערנאציאנאל-אנערקענטע תימן רעגירונג און די איראן-געשטיצטע כותים. אנהייב אוגוסט האבן די כותים דורכגעפירט א בלוטיגע אטאקע אויף רעגירונגס מיליטערישע איינריכטונגען, וואס האט איבערגעלאזט אמוווייניגסטנס 30 טויטע זעלנער און 15 פארוואונדעטע, לויט באריכטן פון 'על דזשאזירא'. דאס האט געפירט צו די יעצטיגע נקמה אפעראציעס איבער עטליכע פראנטן. די פרישע געוואלדטאטן ברענגען ארויף שווערע זארגן אז תימן ריקט זיך אוועק פון די רואיגקייט וואס האט געהערשט זינט דעם פייער-אפשטעל אין יאר 2022.

דער טויש אויפן שלאכטפעלד איז גאר באדייטנד, וויבאלד ביז יעצט האבן הויפטזעכטליך די כותים זיך פארלאזט אויף דראונס פאר אטאקעס, בעת די רעגירונג קרעפטן האבן נישט געהאט די זעלבע מעגליכקייטן. תימן'ער מיליטערישע באאמטע פובליצירן יעצט מער און מער די באנוץ פון די דראונס וואס קענען אידענטיפיצירן צילן און אראפווארפן אויפרייס מאטעריאל אויף אינדיווידועלע קעמפער, טראקס און באפעסטיגטע ערטער. די נייע מעגליכקייטן וועלן מאכן פיל שווערער פאר די כותי איינהייטן זיך צו באהאלטן אין זייערע פאזיציעס ווי נאר די שלאכטן פארשטארקן זיך.

די פראגע איז יעצט צי די דראון אטאקעס וועלן בלייבן בלויז אלס טאקטישע אנגריפן, אדער צי דאס איז א טייל פון א ברייטערע קאמפיין דורך די רעגירונג צו לייגן דרוק אויף די כותים אויף עטליכע פראנטן אויפאמאל. מיט די פארשטארקטע שלאכטן אין עטליכע טיילן פון תימן, קענען די כסדר'דיגע אטאקעס טוישן דעם באלאנס אויפן פעלד. די לעצטע עסקאלאציע איז א קלארע ווארענונג אז די שוואכע רואיגקייט אין לאנד קען זיך גאר בקרוב טוישן צו א פיל מער געפארפולע פאזע פונעם קאנפליקט.