פארטיידיגונג סעקרעטאר העגסעט פראקלאמירט אבסאלוטע זיג קעגן איראן, אבער די קריג האלט נאך אינמיטן פלאקערן

דער אמעריקאנער פארטיידיגונג סעקרעטאר, פיט העגסעט, איז אויפגעטרויטן פארנט פון אמעריקאנער זעלנער און האט פראקלאמירט א געוואלדיגע זיג קעגן איראן. "די אמעריקאנער זעלנער דא האבן אומגעברענגט די איראנער נעיווי, חרוב געמאכט זייער עיר פארס, פארניכטעט זייערע לופט-פארטיידיגונג סיסטעמען, פירערשאפט, און זייער מיליטערישע אינדוסטריע," האט ער געזאגט פארן עולם.

העגסעט האט דאס אראפגעלייגט אלס א מאסיווע דערגרייכונג פון די אפעראציע "עפיק פיורי", די מיליטערישע קאמפיין וואס פרעזידענט טראמפ האט אנגעהויבן אנהייב יאר 2026 מיט'ן ציל צו צעקלאפן איראן'ס מיסיל, נעיווי און פארטיידיגונג אינפראסטרוקטור, און אפצושטעלן זייער וועג צו א נוקלעארע וואפן. העגסעט חזר'ט שוין איבער די ווערסיעס פון זיין זיג פאר עטליכע חדשים, און טענה'ט אז איראן'ס קאנווענציאנאלע מיליטער איז געווארן נייטראליזירט שנעלער און מער פולשטענדיג ווי סיי וועלכע לאנד אין די היסטאריע. פאר די זעלנער אין צימער איז דאס געווען א מעסעדזש פון שטאלץ, אז זייער ארבעט האט שוין געטוישט דעם באלאנס פון מאכט אינעם ראיאן אויף אייביג.

אבער אין רעאליטעט האט זיך די קריג נאכנישט אפגעשטעלט. אריין אין שפעט סעפטעמבער, האבן אמעריקאנער קרעפטן נאך אלץ באמבארדירט איראנער צילן אלס רעאקציע צו איראן'ס אנגייענדע מינע אפעראציעס און אטאקעס אויף קאמערציאלע שיפן. טעהראן האט אויך ווייטער פארגעזעצט צו שיסן דראונס און מיסילס אויף אמעריקאנער און אליאירטע באזעס, חדשים נאכדעם וואס העגסעט האט שוין דערקלערט אז איראן'ס נעיווי און לופט-פארטיידיגונג זענען היסטאריע.

די מלחמה ציט זיך שוין אריין אינעם אכטן חודש אן קיין קלארע ענדע, און האט שוין אפגעקאסט פאר די אמעריקאנער מיליטער הונדערטער טייערע מיסיל אינטערסעפטארס. לויט באריכטן האט די קריג אפגעקאסט מער ווי 11 ביליאן דאלאר בלויז אין די ערשטע פאר טעג.

קריטיקירער, אריינגערעכנט דער געוועזענער טראמפ נאציאנאלע זיכערהייט ראטגעבער דזשאן באלטאן, האבן אפן ארויסגעברענגט צווייפלען צי העגסעט'ס פראקלאמאציעס פון א זיג שטימען מיט די פאקטן אויפ'ן פעלד, א קאנטראסט וואס שטעכט ארויס יעדעס מאל וואס די שלאכטן פלאקערן צוריק אויף.