סאודי אראביע ארבעט פיבערהאפטיג צו פארריכטן וויכטיגע אויל פייפליין נאך דראון אטאקעס; אויל פרייזן האלטן ביי $105 א פאס

סאודי אראביע יאגט זיך צו ברענגען איר קריטישע 'איסט-וועסט' אויל פייפליין צוריק אין באנוץ, מיט א ציל צו צוריקשטעלן ארום האלב פון איר קאפאציטעט אין די קומענדיגע טעג, נאכדעם וואס דראון אטאקעס האבן געצווינגען עס אפצושפארן פאריגע וואך. די סטעיט-געפירטע 'אראמקא' קאמפאני ארבעט יעצט פיבערהאפטיג צו בויען א בייפאס ארום די געשעדיגטע טייל פונעם 1,200-קילאמעטער פייפליין, און מען האפט עס אינגאנצן צו פארריכטן אין ארום זעקס וואכן.

סעטעלייט בילדער וואס זענען געכאפט געווארן דעם 13'טן סעפטעמבער צייגן א שווערע חורבן און פארברענטע ערד ארום איינע פון די הויפט פאמפינג סטאנציעס פונעם פייפליין, וואס צייגט די גרויסע פארנעם פון די שאדנס. בעפאר די אטאקע האט די פייפליין געפירט א געשאצטע 4 ביז 5 מיליאן פאסן קרוד אויל א טאג - וואס מאכט אויס ארום 4 ביז 5 פראצענט פון די גלאבאלע אויל סופליי - פון סאודי אראביע'ס גאלף ברעגעס צו די עקספארט טערמינאלן ביים ים סוף אין יאנבו, וואס איז א קריטישע וועג אנצוקומען צו די אינטערנאציאנאלע מארקעטס.

קריטישע וויכטיגקייט אין שאטן פון מלחמה

די וויכטיגקייט פונעם פייפליין איז נאר געשטיגן זינט די הארמוז דורכגאס איז געווארן כמעט אוממעגליך צו נוצן נאך די מיליטערישע קאנפליקט צווישן אמעריקע-מדינת ישראל און איראן אנהייב יאר. דאס לאזט איבער יאנבו אלס איינע פון סאודי אראביע'ס איינציגסטע פארלאזליכע טויערן צו די גלאבאלע אויל קויפער.

ריאד לייגט די שולד פון די אטאקע אויף דראונס וואס זענען ארויסגעשאסן געווארן דורך איראן-געשטיצטע מיליציעס וואס אפערירן אין איראק. דאס לייגט צו פרישע אנגעצויגנקייט אין א ראיאן וואס איז שוין אזוי אויך אויף רעדער, אריינגערעכנט די חוטי רעבעלן וואס סטראשען סאודישע אויל שיפמענטס אינעם ים סוף.

מארקעט רעאקציע

דערווייל האלטן די פרייזן פון 'ברענט' קרוד אויל ביי ארום $105 א פאס די וואך, בשעת די מארקעטס רעכענען אויס די שאדנס פונעם איבעררייס. סאודי אראביע פרובירט אין די זעלבע צייט צו פארקויפן אלטערנאטיווע אויל וואס גייט נישט דורך די הארמוז דורכגאס, צו העלפן בארואיגן דעם מארקעט.

וויבאלד אראמקא און סאודישע אפישעלס האבן נאך דערווייל נישט ארויסגעגעבן קיין אפיציעלע באריכט איבער די שאדנס אדער א פונקטליכע סקעדזשועל פאר די פארריכטונגען, בלייבט די זעקס-וואכן צייט-אפשניט בלויז אן אומאפיציעלע שאצונג, און די גלאבאלע ענערגיע מארקעטס האלטן א נאנטע אויג אויף סיי וועלכע צייכן פון א פארהאלטונג.