הוטי רעבעלן נעמען פאראנטווארטליכקייט אויף מאסיווע מיסיל און דראון אטאקעס אויף סאודי אראביע'ס הויפטשטאט ריאד

דער מיליטערישער ווארטזאגער פון די הוטי רעבעלן, יאחיא סארי, האט דעם שבת פובליק גענומען פאראנטווארטליכקייט אויף א מאסיווע כוואליע פון באליסטישע מיסילס, קרוז מיסילס און דראונס וואס זענען געשאסן געווארן אויף סענסיטיווע צילן אין סאודי אראביע'ס הויפטשטאט 'ריאד', ווי אויך אויף די 'אראמקא' אויל פאסיליטיס אינעם פארט שטאט 'יאנבו'.

סארי האט דערקלערט די אפעראציע אלס א סוקסעס און געזאגט אז די אטאקעס האבן אנגעצינדן גרויסע פייערן. זיינע ווערטער זענען באשטעטיגט געווארן דורך דראמאטישע ווידעא קליפס וואס זענען ארומגעפארן אויף די סאציאלע מידיא, וואו מען זעט שווערע שווארצע רויך און גרויסע פלאמען ארויפקומען פון א ברענשטאף סטארידזש נעבן דעם 'קינג כאליד' אינטערנאציאנאלן עירפארט.

סאודישע אויטאריטעטן האבן באשטעטיגט אז זייערע עיר-דעפענס סיסטעמען האבן סוקסעספול אראפגעשאסן א באליסטישע מיסיל וואס איז געווען געצילט אויף די הויפטשטאט. דורכאויס די נאכט האבן זיך געהערט אלארמס איבער ריאד, און פליגער טראפיק ביים הויפט עירפארט איז געווארן אפגעשטעלט פאר א קורצע צייט, ביז די רעגירונג האט געמאלדן פארטאגס אז די געפאר איז פאריבער.

א שארפע עסקאלאציע אין די ראיאן

די יעצטיגע אטאקע צייגט אויף אן ערנסטע עסקאלאציע אין די לאנג-פארצויגענע ציווילע קריג אין תימן. דאס איז די ערשטע מאל וואס די הוטי אטאקעס האבן קענטיג דערגרייכט ריאד זייט די שלאכטן צווישן די גרופע און די סאודי-געשטיצטע קאאליציע האבן זיך פארשטערקערט אנהייב יאר.

די הוטים זאגן אז די אטאקעס זענען א נקמה שריט פאר די סאודישע לופט-סטראיקס אויף תימן'ס הויפטשטאט 'סאנא'. סאודי אראביע פון איר זייט שטיצט די אינטערנאציאנאל-אנערקענטע רעגירונג אין תימן קעגן די איראן-געשטיצטע הוטי באוועגונג, וועלכע קאנטראלירט יעצט דעם סטראטעגיש-וויכטיגן 'באב על-מאנדאב' דורכגאס.

די פרישע אטאקע קומט נאך וואכן פון אנגעצויגנקייט און שווערע פיינדליכקייטן, אריינגערעכנט אן אטאקע דעם 8'טן סעפטעמבער וואס האט געטראפן ענערגיע פאסיליטיס אין פיר סאודישע שטעט און פארוואונדעט 73 מענטשן. יענע אטאקע האט געברענגט צו ארום 50 נקמה-סטראיקס פון די סאודישע קאאליציע. עס בלייבט יעצט איבער די פראגע וויאזוי ריאד וועט רעאגירן צו אזא דירעקטע אטאקע אזוי נאנט צו איר אייגענע הויפטשטאט.