די טעכנאלאגיע פירמע 'ענדוריל אינדוסטריס' (Anduril Industries) האט געמאלדן א מאסיווע אינוועסטמענט פון 3.7 ביליאן דאלאר פון אירע אייגענע געלטער צו בויען א ריזיגע, מאדערנע שיפבויעריי צענטער אין מערילענד. דער נייער פראדזשעקט, וואס ווערט אנגערופן 'ארסענאל-2' (Arsenal-2), וועט זיך ציען אויף מער ווי צוויי מיליאן סקווער פיס אינעם 'טרעידפוינט אטלאנטיק' קאמפלעקס אין ספעראוס פוינט, מערילענד, אויפ'ן פלאץ פונעם אמאליגן 'בעטהלעהעם סטיל' פאבריק.

דער נייער צענטער וועט פראדוצירן קאמפליצירטע טיילן און גרויסע שטיקער פאר די 'ווירדזשיניע-קלאס' אטאקע סובמארינען. נאכ'ן ווערן פראדוצירט אין מערילענד, וועלן די טיילן אפגעשיקט ווערן צו אנדערע פירמעס ווי 'דזשענעראל דיינעמיקס' און 'האנטינגטאן אינגאלס' פאר די ענדגילטיגע צוזאמשטעלונג. אין א נייע ווידעא וואס די פירמע האט ארויסגעגעבן, קען מען זען א פוטוריסטישע בילד וויאזוי ריזיגע סובמארין-טיילן פארן אדורך די מאדערנע פראדוקציע ליניעס, באגלייט מיט פארגעשריטענע ראבאטיקס און טעכנאלאגיע.

די אינוועסטמענט איז א טייל פון א ברייטערע 6.6 ביליאן דאלאר שותפות מיט די אמעריקאנער נעיווי. די נעיווי האט זיך אונטערגענומען צו צאלן ביז 2.9 ביליאן דאלאר אין קאנטראקטן, געוואנדן לויט די פראדוקציע פארשריט.

א קריטישע מאנגל אין סובמארינען

די שריט קומט אין א גאר קריטישע צייט פאר די מיליטער. די אמעריקאנער נעיווי דארף יעצט האבן צווישן צוויי ביז דריי נייע 'ווירדזשיניע-קלאס' סובמארינען יעדעס יאר, אבער דערווייל באווייזן זיי קוים צו פראדוצירן איין סובמארין א יאר. דער מאנגל האט אנגעצויגן די אמעריקאנער פלאטע און שטעלט אין געפאר אירע אינטערנאציאנאלע אפמאכן מיט אויסטראליע און ענגלאנד (די אזוי-גערופענע AUKUS אפמאך).

עס ווערט ערווארטעט אז דער 'ארסענאל-2' פראדזשעקט וועט זיין פולשטענדיג אין אפעראציע ארום יאר 2030, און וועט צוגעבן בערך 9 מיליאן ארבעטס-שטונדן א יאר צו די סובמארין אינדוסטריע, וואס באאמטע שאצן וועט הייבן די פראדוקציע מיט ארום 15 פראצענט.

דער מאסיווער פראדזשעקט וועט שאפן מער ווי 3,100 דירעקטע דזשאבס און שטיצן נאך טויזנטער אומדירעקטע ארבעטער. די לאקאלע רעגירונגען אין מערילענד און באלטימאר קאונטי געבן אויך ספעציעלע אינסענטיווס ארויסצוהעלפן דעם פראדזשעקט. פאר א ראיאן וואס איז אמאל געווען באקאנט מיט אירע פארמאכטע שטאל-פאבריקן, ווערט דאס באטראכט ווי אן עכטע אויפלעבונג פון די אמעריקאנער שיפבויעריי אינדוסטריע, פונקט אין די צייט וואס די נעיווי דארף עס דאס מערסטע.