בס"ד

ווילדע סצענעס אין קאליפארניע עירפארט: פאסאזשיר ברעכט זיך איין אויפ'ן טארמאק און גנב'עט א שלעפ-טראקטאר

אן אומגעווענליכע און ווילדע סצענע האט זיך אפגעשפילט דינסטאג אוונט, אקטאבער 6, אויפ'ן טארמאק אינעם 'דזשאן וועין עירפארט' אין סענטע אנא, קאליפארניע, ווען א פאסאזשיר האט זיך אריינגעכאפט דורך אן אומבאוואכטע טיר נעבן געיט 12 און ארויסגעלאפן אויפ'ן עירפארט פעלד.

דער פארשוין, וועלכער איז אידענטיפיצירט געווארן דורך די ארענדזש קאונטי שעריף דעפארטמענט אלס דער 26-יעריגער סקיילער דזשעי באר פון וואשינגטאן סטעיט, איז ארויפגעשפרינגען אויף אן 'אלאסקא עירליינס' טראקטאר - א טרעקל וואס ווערט גענוצט צו שלעפן פליגערס און באגאזשן - און אנגעהויבן פארן דערמיט אויף א ווילדע אופן איבער'ן טארמאק. א ווידעא וואס איז געכאפט געווארן דורך אן ארומיגער צייגט ווי דער מאן דרייווט דעם טרעקל געפערליך נאנט צו געפארקטע פליגערס און צום טעקסי-וועי, ביז זיין ווילדע רייזע האט זיך געענדיגט ווען ער האט אריינגעקראכט אין אן אנדערע קאר נעבן געיט 7.

אנשטאט זיך אפצושטעלן דארט, האט ער נאך פרובירט צו גנב'ענען אן 'אמעריקען עירליינס' טראק וואס סערווירט די בתי כבוד אויף די פליגערס, אבער די עירפארט פאליציי האט אים שנעל אראפגעכאפט און ארעסטירט אויף קלאגעס פון קאר גניבה, טרעספאסינג און וואנדאליזם.

דער זיכערהייט ברעך האט געפירט דערצו אז די עיר טראפיק קאנטראלערס האבן ארויסגעגעבן א צייטווייליגע 'גראונד סטאפ' פארארדענונג, אפצושטעלן אלע פליגערס אויפ'ן פעלד, בעת ארבייטער האבן איבערגעזוכט דעם טעקסי-וועי צווישן געיט 7 און 12 צו זיכער מאכן אז עס ליגן נישט קיין שטיקער פונעם קראך וואס קענען שטעלן פליגערס אין א סכנה. די אפעראציעס זענען צוריק צו נארמאל נאך ארום 10 מינוט.

אינטערעסאנט איז אנצומערקן אז זיין אייגענע 'דעלטא' פלייט קיין סיאטל איז בכלל נישט אפעקטירט געווארן פונעם אינצידענט, און האט זיך געהויבן 9 מינוט פריער ווי געפלאנט און געלאנדעט 20 מינוט פריער. דעלטא עירליינס האט געמאלדן אז זיי ארבעטן אינאיינעם מיט די אויספארשער, בעת אלאסקא עירליינס האט אנגעוויזן אז דער טראקטאר באלאנגט באמת פאר א קאנטראקטאר פירמע וואס גיט זיך אפ מיט די גראונד ארבעט.