שפאנונג אין איראן: רעוואלוציאנערע גווארדיע מאביליזירט טויזנטער זעלנער אין טעהראן בעת די מלחמה מיט אמעריקע און מדינת ישראל גייט אריין אינעם זיבעטן חודש

איראן'ס רעוואלוציאנערע גווארדיע האט אנגעהויבן מאביליזירן טויזנטער זעלנער און וואלונטירן איבער די גאסן פון דער הויפטשטאט טעהראן, אין די צייט וואס די מלחמה צווישן איראן מיט אמעריקע און מדינת ישראל ריקט זיך אריין אינעם זיבעטן חודש.

די יעצטיגע מאביליזאציע קומט נאך די מאסיווע אטאקעס וואס האבן פאסירט אנהייב פון די מלחמה אינעם פארגאנגענעם חודש פעברואר, ווען אמעריקע און מדינת ישראל האבן דורכגעפירט א רייע ציל-גענויע אטאקעס וואס האבן אומגעברענגט דעם העכסטן איראנער פירער, דעם הויפט קאמאנדיר פון די רעוואלוציאנערע גווארדיע, און נאך אנדערע הויכראנגיקע באאמטע אין איין מערדערליכע כוואליע.

זינט דעמאלט האט טעהראן אנגעהויבן מאכן גרויסע פובליקע מאכט-דעמאנסטראציעס. באאמטע פון די רעוואלוציאנערע גווארדיע רימען זיך אז הונדערטער טויזנטער וואלונטירן האבן זיך איינגעשריבן אין ספעציעלע טרענירונג קעמפס זיך מקריב צו זיין פארן לאנד, און מאסן פארזאמלונגען פילן אן די גאסן פון די הויפטשטאט. דער פארנעם פון די מאביליזאציע צייגט ווי ערנסט דער רעזשים נעמט די סטראשע פון פרישע אטאקעס אויף זייער פארבליבענע פירערשאפט.

לויט א באריכט פון 'טעראר אלארם' צו 'C14', זאגן געוויסע אנאליסטן אז די ערשטע אטאקעס אויף די פירערשאפט זענען קיינמאל נישט געווען געצילט צו אינגאנצן אראפווארפן דעם רעזשים, נאר ענדערש אפצושוואכן איראן'ס נוקלעארע און באליסטישע מיסיל פראגראמען דורכן עלימינירן די באאמטע וואס זענען געווען פאראנטווארטליך דערויף. אבער מיליטערישע עקספערטן ווארענען יעצט אז דער קאנפליקט קען אריינגיין אין א פיל מער געפארפולע פאזע, וואס וועט זיין באגלייט מיט אן אגרעסיווע באמבארדירונג קאמפיין מיט א קלארן ציל צו טוישן דעם רעזשים, אנגעהויבן מיט די ציל-גענויע עלימינירונג פון די פארבליבענע הויכראנגיקע פירער.

כאטש וואס די שאצונג איז נאכנישט באשטעטיגט געווארן דורך אמעריקאנער אדער מדינת ישראל באאמטע, אויב זאל דאס טאקע פאסירן, וועט עס באדייטן א שארפע עסקאלאציע אין א מלחמה וואס איז שוין יעצט פון די טויטליכסטע וואס איראן האט געקעמפט אין די לעצטע צענדליגע יארן. דערווייל זענען די גאסן פון טעהראן אנגעפילט מיט מאביליזירטע זעלנער און וואלונטירן וועלכע גרייטן זיך אויף וואס אימער עס קען קומען נעקסט.