דראמאטישע ווידעא אנטפלעקט: אמעריקאנער קאמאנדאס ראטעווען פארוואונדעטן זעלנער טיף אין איראן נאך 50 שעה

דער פענטאגאן האט ארויסגעגעבן א פרישע דעקלאסיפיצירטע ווידעא וואס צייגט די דראמאטישע לעצטע מינוטן פון איינע פון די מערסט-געוואגטע רעטונג אפעראציעס דורכאויס די איראנע מלחמה. די מיסיע איז געווען ארויסצוראטעווען א פארוואונדעטן אמעריקאנער עיר-פארס אפיציר, וועלכער ווערט בלויז אידענטיפיצירט מיט זיין רוף-נאמען "ברעווא" (Bravo). די ווידעא צייגט ווי צוויי ספעציעלע עיר-פארס רעטונגס קאמאנדאס דערגרייכן אים אויף א פארווארפענעם בארג און פירן אים אין זיכערהייט, נאכדעם וואס ער האט פארבראכט קרוב צו 50 שעה זיך באהאלטנדיג טיף אין פיינטליכע טעריטאריע.

ברעווא איז געצווונגען געווארן זיך ארויסצושיסן פון זיין 'F-15E סטרייק איגל' קאמפס-עראפלאן אינאיינעם מיט זיין פילאט, באקאנט אלס "אלפא", נאכדעם וואס זייער דזשעט איז געווארן געטראפן דורכאויס א ביינאכט מיסיע. בעת'ן פאלן מיט א געוואלדיגע שנעלקייט צו דער ערד האט זיין פאראשוט געליטן שאדנס, און ער האט געלאנדעט מיט שווערע וואונדן. זיין פילאט אלפא איז געראטעוועט געווארן ביז עטליכע שעה, אבער ברעווא איז געבליבן אליינס, פארוואונדעט און באהאלטן פאר צוויי פולע טעג בעפאר די רעטער זענען אנגעקומען צו אים.

צו טרעפן ברעווא איז געווען איינע פון די שווערסטע טיילן פון די גאנצע אפעראציע. די 'סי-איי-עי' (CIA) שפיאנאזש אגענטור האט זיך אריינגעמישט און אנגעפירט א קאמפיין צו פארפירן די איראנע זוכער, בשעת זיי האבן גענוצט ספעציעלע טעכנאלאגיע צו פונקטליך לאקירן וואו ער געפינט זיך. דאס האט געגעבן פאר די אמעריקאנער קאמאנדירן די מעגליכקייט צו האנדלען בעפאר די איראנע קרעפטן, וואס האבן אים אקטיוו געזוכט, קומען אן צו אים. צוליב די גרויסע געפאר האבן די קאמאנדירן באשלאסן נישט צו ווארטן אויף די טונקלקייט פון דער נאכט, נאר האבן דורכגעפירט א טייל פון די רעטונג אפעראציע אינמיטן העלן טאג.

דורכצופירן די רעטונג האט זיך פארלאנגט א מאסיווע און קאארדינירטע ארבעט. מער ווי 90 ספעציעלע קרעפטן, אריינגערעכנט פון די בארימטע 'דעלטא פארס' און 'נעיווי סיעל טיעם 6', האבן זיך באטייליגט אין די מיסיע אויף דער ערד, מיט די הילף פון עראפלאנען און שפיאנאזש אגענטן אונטער די קוליסן. אמעריקאנער לופט-אטאקעס אויף איראנע רעוואלוציאנערע גווארדיע פאזיציעס אין די געגנט האבן אויסגערייניגט דעם וועג, און די רעטונגס-טיעם איז אריינגעפלויגן מיט 'MH-6 ליטל בוירד' העליקאפטערס אים אויפצופיקן. די אפעראציע האט באצייכנט דאס ערשטע מאל אין צענדליגע יארן וואס אמעריקאנער טרופן האבן געטרעטן אויף איראנע באדן, וואס צייגט ווי ספעציעל און געפארפול די מיסיע איז געווען.

אפילו ביים אהיימגיין זענען אונטערגעקומען קאמפליקאציעס אין די לעצטע מינוט. אן עראפלאן וואס האט ארויסגעהאלפן די מיסיע איז שטעקן געבליבן אינעם זאמד ביי א פראוויזארישע לאנדונגס-פלאץ. אן אנדערע געהיימע איינהייט האט געמוזט אריינקומען פארענדיגן די רעטונג, און מען האט שפעטער פארניכטעט דעם שטעקן-געבליבענעם עראפלאן כדי די טעכנאלאגיע זאל נישט אריינפאלן אין איראנע הענט.

דורכאויס די גאנצע שווערע איבערלעבעניש, דערציילט ברעווא, האט ער זיך פארלאזט אויף זיין אמונה. ער דערמאנט זיך א מאמענט וואס ער האט זיך פשוט אפגעשטעלט און געבעטן צום אויבערשטן אז זיין רצון זאל געשען. קוקנדיג צוריק אויף די מינוט וואס די קאמאנדאס האבן אים ענדליך דערגרייכט, רופט ער עס אן אלס איינע פון די גרעסטע מאמענטן אין זיין לעבן, און ער זאגט אז זיין איבערלעבן און רעטונג איז א קלארע צייכן פון השגחה פרטית און חסדי השם.