פראנצויזישער פרעזידענט עמאנועל מאקרון האט מיטגעהאלטן פונעם דעק פון די 'אווערן' קריגס-שיף ווי פראנקרייך האט דורכגעפירט דעם ערשטן פראבע-שיס פון איר נייע 'M51.3' באליסטישע מיסיל. די מיסיל, וואס איז פארשטייט זיך נישט געווען באוואפנט מיט קיין נוקלעארע שפיץ, איז געשאסן געווארן פונעם 'לע ווידזשילענט' נוקלעארע סובמארין און האט געלאנדעט הונדערטער קילאמעטער ווייט אינעם נארד אטלאנטיק אקעאן.

דער פרעזידענט האט אנגערופן דעם סוקסעספולן טעסט אלס א קלארע באווייז אויף פראנקרייך'ס נוקלעארע קראפט, און האט דעקלערט מיט א שטארקייט: "כדי א פאלק זאל זיין פריי, דארף מען מורא האבן פון איר, און כדי מען זאל מורא האבן, דארף מען זיין מעכטיג." ער האט אראפגעשטעלט דעם פראבע-שיס סיי אלס א טעכנישע מיילשטיין און סיי אלס א געא-פאליטישע סטעיטמענט.

מאקרון האט געלויבט די פארשידענע אגענטורן און פירמעס וואס זענען געשטאנען אונטער דעם קאמפליצירטן פראיעקט, אריינגערעכנט די 'DGA' פארטיידיגונגס אגענטור, די 'CEA' אטאמישע ענערגיע קאמיסיע, די מיסיל פראדוצירער 'אריאן-גרופ', סובמארין בויער 'נעיוואל גרופ', און די פראנצויזישע נעיווי. ער האט ארויסגעברענגט אז זייער עקספערטיז איז עפעס וואס בלויז געציילטע לענדער אויף דער וועלט פארמאגן. "זייער ווייניג לענדער האבן די מעגליכקייט צו דיזיינען, בויען און שיסן אזא קאמפליצירטע וואפן פון אונטערן וואסער," האט מאקרון געזאגט.

דער פרעזידענט האט פארבינדן דעם יעצטיגן מיסיל טעסט צו א ברייטערע מיליטערישע אויפבוי וואס ער האט אנגעהויבן נאך אין 2017. ער האט אנגעוויזן אז פראנקרייך'ס פארטיידיגונגס בודזשעט וועט זיך האבן געטאפלט אין די לעצטע צען יאר, און אז נייע דור סטראטעגישע סובמארינען ווערן שוין יעצט געבויט צו עווענטועל ערזעצן די איצטיגע פלאטע.

ווי אויך האט ער דערמאנט א פרישע פראגראם וואס איז אונטערגענומען געווארן דאס יאר צו אנטוויקלען הייפערסאניק מיסילס וואס וועלן קענען געשאסן ווערן פון עראפלאנען, וואס דאס וועט צוגעבן א דריטע פאזע פון מאדערניזאציע צו זייער נוקלעארע ארסענאל.

"דער מעסעדזש איז פשוט," האט ער אויסגעפירט. "אונזער נוקלעארע קראפט באשיצט דאס לאנד יעצט, און וועט אונז ווייטער באשיצן פאר די קומענדיגע צענדליגע יארן, אומאפהענגיג פון וועלכע נייע סטראשונגען עס זאלן זיך נאר מאכן." מאקרון האט געשלאסן זיין רעדע מיט א סאלוט, אראפשטעלנדיג דעם טעסט סיי אלס א טעכנישע געווינס און סיי אלס א קלארע מעסעדזש פון פעסטקייט פאר די גאנצע וועלט.