בס"ד

סעטעלייט בילדער צייגן: איראן פארראכט און פארברייטערט איר געהיימע אונטערערדישע לופט-באזע טראץ אמעריקאנער און מדינת ישראל אטאקעס

פרישע סעטעלייט בילדער וואס זענען ארויסגעשטעלט געווארן דורך די 'פלענעט לעבס' פירמע צייגן ווי איראן האלט אינמיטן פאררעכטן און פארברייטערן איר געהיימע אונטערערדישע 'איגעל-44' לופט-באזע אין די הארמאזגאן פראווינץ. דאס קומט נאכדעם וואס די באזע איז געווארן באטראפן פון כאטש פיר כוואליעס פון אמעריקאנער און מדינת ישראל אטאקעס אינעם יאר 2026.

לויט די בילדער קען מען זען אז די איראנער האבן שוין אפגערומט די שטרויכלונגען פונעם ראנוועי, פארענדיגט נייע קאנקריט 'טעקסי-וועי' סעקשאנס, פארפילט די לעכער וואס זענען געווארן פון די באמבעס, און האלטן אינמיטן בויען פרישע טעקסי-וועיס. כאטש עטליכע געביידעס אויפן אויבערפלאך זעען נאך אויס צו זיין געשעדיגט, זענען אבער אלע פיר אריינגענג צו די טאנעלן געבליבן גאנץ. דאס ברענגט ארויף די פראגע וויפיל שאדן די אטאקעס האבן באמת אנגעמאכט, און עס איז דערווייל אומקלאר צי די באזע איז יעצט אפעראציאנאל.

איראן האט אנטפלעקט די באזע צום ערשטן מאל אין יאר 2023, אלס א קאמפלעקס וואס איז אויסגעגראבן טיף אין די בערג מיט לאנגע אונטערערדישע הענגערס און טאנעלן, געצילט צו באהאלטן F-4 פאנטאם קאמפס-עראפלאנען, דראונס און מיסילס. די באזע געפינט זיך ארום 100 מייל פונעם סטראטעגישן 'סטרעיט אוו הארמוז' און פארמאגט א 2.7-מייל לאנגע ראנוועי אויפן אויבערפלאך.

די ניו יארק טיימס האט שוין פריער אינעם יאר באריכטעט אז סעטעלייט בילדער האבן געוויזן שאדנס ביי די באזע, כאטש עס איז קיינמאל נישט אפיציעל באשטעטיגט געווארן ווער עס איז געשטאנען אונטער יענע אטאקע. עקספערטן ווייזן אן אז סעטעלייט בילדער קענען בלויז צייגן וואס עס טוט זיך אויפן אויבערפלאך, אבער נישט וואס עס קומט פאר אינעווייניג אין די טאנעלן. דערפאר קען מען נישט וויסן אויף זיכער צי מען קען שוין צוריק ארויסשיסן עראפלאנען און מיסילס פון דארט. די אומקלארקייט איז פונקטליך די סיבה פארוואס אנאליסטן האלטן א נאנטן אויג אויף די פרישע בוי-ארבעט וואס קומט דארט פאר.