מדינת ישראל'ס דיאספארא מיניסטער עמיחי שיקלי האט נאכאמאל אריינגעטרעטן אין די אייראפעאישע פאליטישע קאמפן, נאכן שארף אטאקירן א גרויסע טייל פון די אייראפעאישע פירערשאפט. ער האט זיי באשולדיגט אז זיי זענען געווארן צו לינק און עקסטרעם, און האבן זיך פאקטיש צוזאמענגעשטעלט מיט ראדיקאלע איסלאמישע גרופעס און סימפאטיזירן מיט כאמאס. שיקלי טענה'ט אז די דאזיגע באוועגונגען האבן א טיפע האס קעגן ישראל, און עס באומרואיגט זיי שטארק ווען רעכטע נאציאנאלע כוחות קאאפערירן אינאיינעם.

דער מיניסטער האט ספעציפיש אנגעוויזן אויף די רעכטע 'וואקס' (Vox) פארטיי אין שפאניע און די 'נעשאנאל רעלי' פארטיי אין פראנקרייך אלס א מוסטער פון די סארט קאאפעראציע וואס מאכט די אייראפעאישע עליטע אומבאקוועם. ער האט אויסגעפירט מיט א האפענונג אז אייראפע וועט זען אן אויפשטייג פון א שטארקע נאציאנאלע פירערשאפט.

א ברייטערע סטראטעגיע

די קאמענטארן זענען נישט קיין נייע זאך פאר שיקלי. שוין פאר עטלעכע יאר וואס ער ארבעט אריין צו בויען נאענטע באציאונגען מיט די רעכטע און עקסטרעם-רעכטע פאליטישע פארטייען אין אייראפע, אלס א קאנטער-געוויכט קעגן די וואקסנדע אנטי-ישראל שטימונג וואס קומט צוליב די מאסיווע מוסולמענער אימיגראציע. ער האט זיך שוין באטייליגט ביי ראליס ארגאניזירט דורך די 'וואקס' פארטיי אין מאדריד אינאיינעם מיט פיגורן ווי דער ארגענטינער פרעזידענט כאוויער מילעי. ווי אויך האט ער זיך פערזענליך געטראפן מיט דעם פירער פון די פראנצויזישע 'נעשאנאל רעלי' פארטיי, דזשארדאן בארדעלע, וועמען ער האט שפעטער פארבעטן צו א קאנפערענץ אין ישראל איבער קעמפן קעגן אנטיסעמיטיזם.

שיקלי האט שוין אין די פארגאנגענהייט קלארגעשטעלט זיין צוגאנג, זאגנדיג אז די רעכטע פארטייען אין אייראפע "זענען גערעכט" וויבאלד זיי פארשטייען דעם סכנה פון ראדיקאלע איסלאם און זענען גרייט צו טון למעשה דערוועגן. דאס מאכט אים פאר איינע פון די מערסט אנגעזעענע ישראל'דיגע באאמטע וואס זוכן צו ארבעטן מיט די רעכטע פראקציעס אין אייראפע, אנשטאט די טראדיציאנאלע צענטער-לינקע אליאירטע.

היסטארישע קאנטראווערסיעס

די סטראטעגיע קומט אבער אן מיט גרויס קאנטראווערסיע, אפילו צווישן די וואס שטיצן געווענליך ישראל. די 'וואקס' פארטיי איז שוין עטליכע מאל קריטיקירט געווארן פארן אויפנעמען מענטשן מיט נעא-נאצישע פארבינדונגען. די פראנצויזישע 'נעשאנאל רעלי' פארטיי האט אירע ווארצלען אין א פארטיי וואס איז געגרינדעט געווארן אין די 1970ער יארן דורך געוועזענע 'וואפען עס-עס' מיטגלידער, און איז אנגעפירט געווארן פאר צענדליגע יארן דורך זשאן-מארי לע פען, א מאן וואס איז עטליכע מאל געפונען געווארן שולדיג פארן העצן און לייקענען פארברעכנס קעגן די מענטשהייט.

אידישע ארגאניזאציעס און קאמענטאטורן זענען שארף ארויסגעקומען קעגן שיקלי'ס שריט. זיי טענה'ן אז די היסטארישע ווארצלען פון די פארטייען מאכט זיי פאר אומפאסיגע שותפים, טראץ זייער יעצטיגע פרא-ישראל שטעלונג. אפילו די וואס זענען איינשטימיג מיט שיקלי איבער די סכנה פון איסלאמישע אנטיסעמיטיזם, פרעגן זיך צי דאס ארומנעמען די עקסטרעם-רעכטע איז א קלוגע שריט פאר ישראל'ס אינטערנאציאנאלע רעפוטאציע אויפן לאנגן טערמין.

פון שיקלי'ס לעצטע ווערטער זעט אבער אויס אז ער פלאנט בכלל נישט צוריקצוטרעטן פון זיין מהלך טראץ די קריטיק. דורכ'ן אראפלייגן די פאליטישע טיילונג אין אייראפע אלס א קאמף צווישן די לינקע עליטע און די נאציאנאלע כוחות, לייגט ער אראפ די באציאונגען מיט פארטייען ווי 'וואקס' און 'נעשאנאל רעלי' אלס א נאטירליכע אליאנץ. צי די סטראטעגיע וועט זיך אויסארבעטן ווענדט זיך אסאך אין ווי אזוי די אייראפעאישע פארטייען וועלן זיך ווייטער אנטוויקלען, און צי זייערע פירער וועלן זיך דערווייטערן פון די עקסטרעמע עלעמענטן וואס האבן געברענגט די קאנטראווערסיעס אין די פארגאנגענהייט. דערווייל לייגן שיקלי'ס קאמענטארן צו נאך א קאפיטל צו די אנגייענדע טויש אין ווי אזוי געוויסע טיילן פון די ישראל'דיגע גאווערנמענט קלייבן זיך אויס זייערע פריינט אין אייראפע.