די מדינת ישראל מיליטער האט דורכגעפירט א פונקטליכע לופט-אטאקע אויף די דרום לבנון דארף 'באראשית', נאכדעם וואס די טעראר גרופע האט ווידער פארלעצט דעם פייער-אפשטעל אפמאך.

לויט באריכטן אין די לבנון'ער מידיא, אריינגערעכנט די חיזבאללא-געשטיצטע 'על-מאנאר' קאנאל, האט די אטאקע פאסירט אין באראשית, וואס געפינט זיך אין די בינט-דזשובעיל דיסטריקט, ארום 9 קילאמעטער פון די מדינת ישראל גרעניץ נעבן מנרה. ווידעא קליפס וואס זענען פארשפרייט געווארן אויף די סאציאלע נעצן צייגן א מעכטיגע אויפרייס מיט א שווערע וואלקן פון שווארצע רויך וואס הייבט זיך אויף איבער די בערגיגע געגנט. דאס דארף באראשית דינט שוין לאנגע יארן אלס א צענטראלע באזע פאר חיזבאללא טעראריסטן, און איז שוין עטליכע מאל געווען א ציל פאר צה"ל אפעראציעס צו פארניכטן די טעראר אינפראסטרוקטור.

די יעצטיגע אטאקע קומט אין ליכט פון נאכאנאנדע פארלעצונגען פונעם פייער-אפשטעל אפמאך וואס איז צושטאנד געקומען דורך אמעריקע אין יוני 2026. דער אפמאך האט געזאלט ברענגען אן ענדע צו די אנגעצויגנקייט אויפן גרעניץ, אנטוואפענען די טעראר גרופעס, און איבערגעבן די קאנטראל פאר די אפיציעלע לבנון מיליטער. אבער אנשטאט דעם, האט חיזבאללא ווייטער פרובירט איבערצובויען אירע מיליטערישע פאזיציעס אין ערטער ווי באראשית.

מיט די פרישע אטאקעס, צייגט מדינת ישראל אן אומבויגעוודיגע אנטשלאסנקייט צו באשיצן די איינוואוינער אין צפון און נישט ערלויבן די איראן-געשטיצטע טעראריסטן זיך צוריקצוקערן צו זייערע אלטע פאזיציעס און טונעלן. עס איז קלאר אז די טעראר גרופעס קוקן אן דעם אפמאך בלויז אלס א צייטווייליגע פויזע זיך צו קענען איבערפרישן, און נישט אלס אן אמת'ע שלום אפמאך.

די לופט-אטאקעס שיקן א קלארע מעסעדזש אז מדינת ישראל וועט נישט טאלערירן קיין שום סטראשע קעגן אירע בירגער, און וועט נישט צולאזן אז די טעראריסטן זאלן זיך קענען איבערבויען אונטערן שלייער פון א צייטווייליגע פייער-אפשטעל. ווי לאנג צה"ל האלט אן אירע אפעראציעס קעגן די איבערגעבליבענע חיזבאללא קעמערלעך אין דרום לבנון, בלייבט דער ציל קלאר: מען וועט נישט ערלויבן א צוריקקער צו די טעג וואס האבן געצווינגען צענדליגע טויזנטער איינוואוינער צו אנטלויפן פון זייערע היימען ביים גרעניץ. שטרענגע און אנטשלאסענע שריט ווי די אפעראציע אין באראשית איז די איינציגסטע שפראך וואס די טעראריסטן פארשטייען.