דזשעי. פי. מארגען טשעיס פירער ווארנט ניו יארק סיטי מעיאר: העכערע טעקסעס וועט פארטרייבן ביזנעסער פון די שטאט

דער הויפט פירער פון די מעכטיגע 'דזשעי. פי. מארגען טשעיס' באנק, דזשעימי דיימאן, האט ארויסגעשטעלט א שארפע ווארענונג פארן ניו יארק סיטי מעיאר זאהראן מאמדאני, אז העכערע טעקסעס און שוואכע רעגירונג פאליסיס קענען מאכן די שטאט ווייניגער אינטערעסאנט פאר ביזנעסער, ארבעטער און אינוועסטירער.

אין זיינע קאמענטארן איבער ניו יארק'ס עקאנאמישע קאנקורענץ, האט דיימאן אונטערגעשטראכן אז שטעט מוזן זיך פארמעסטן פאר טאלאנט, אינוועסטמענטס און עקאנאמישע וואוקס פונקט ווי קאמפאניס קאנקורירן פאר קאסטומערס. ער האט ספעציפיש אנגעוויזן אויף שטעט ווי שאנכאי, האנג קאנג, סינגאפור און נעשוויל אלס ערטער מיט וועמען ניו יארק דארף זיך פארמעסטן, זאגנדיג דעם באקאנטן אויסדרוק: "מענטשן שטימען מיט זייערע פיס" (דאס הייסט, מענטשן ציען זיך אוועק אהין וואו עס איז זיי בעסער).

דיימאן האט קלארגעשטעלט אז ער שטיצט דעם מעיאר'ס צילן ווי צו בויען מער 'עפארדעבל האוזינג' און טשיילדקעיר פראגראמען, אבער ער טענה'ט אז אנצוקומען דערצו פאדערט זיך גוטע און עפעקטיווע פאליסיס, און נישט סתם העכערן טעקסעס אדער רעגירונג ספענדינג. ער האט געווארנט אז רעגירונג פראגראמען קענען אסאך מאל ברענגען פונקט דעם פארקערטן רעזולטאט ווי געפלאנט אויב זענען זיי נישט גוט אויסגעשטעלט. זיינע ווערטער קומען אין ליכט פון די ברייטע דעבאטע איבער מאמדאני'ס פלענער צו העכערן די טעקסעס אויף רייכע ניו יארקער, און וויאזוי דאס קען אפעקטירן די לאקאלע ביזנעס קלימאט.

דער באנק פירער האט אויך ארויסגעברענגט אז ניו יארק'ס סוקסעס ווענדט זיך אין מער ווי בלויז די טעקס סיסטעם. ער האט אנגעוויזן אז גוטע שולעס, פובליק סעיפטי און די אלגעמיינע קוואליטעט פון לעבן זענען קריטישע פאקטארן צו צוציען ביזנעסער און איינוואוינער. ער האט געפאדערט פונעם מעיאר צו מאכן די שטאט א פלאץ וואו מענטשן ווילן בויען קאמפאניס, אינוועסטירן, אויפציען פאמיליעס און וואוינען, ווארנענדיג אז ביזנעסער און פריוואטע מענטשן קענען זיך גרינג אריבערציען קיין אנדערע שטעט וואס אפערן בעסערע קאנדישאנס.

דיימאן האט שוין אין דער פארגאנגענהייט קריטיקירט ניו יארק'ס הויכע פערזענליכע, קארפאראט און עסטעיט טעקסעס אלס א שטארקע חסרון וואס שטופט אוועק עקאנאמישע אקטיוויטעטן. צוגלייך האט ער אבער אנערקענט ניו יארק'ס מעלות, אריינגערעכנט איר מעכטיגע פינאנציעלע סעקטאר, קולטורעלע אינסטיטוציעס, רעסטוראנטן און די גרויסע קאנצענטראציע פון טאלאנט.

זיין הויפט מעסעדזש צום מעיאר איז געווען אז מען קען נאכגיין פובליק פריאריטעטן ווי עפארדעבל האוזינג אן אונטערצוברענגען די עקאנאמישע יסודות וואס העלפן די שטאט וואקסן. עס בלייבט יעצט א גרויסע פראגע פאר די שטאט'ס עקאנאמישע צוקונפט צי מאמדאני'ס טעקס פאליסיס וועלן קענען דעליווערן זיינע צילן און אין די זעלבע צייט אנהאלטן די ביזנעסער און רייכע איינוואוינער אין ניו יארק.