איראנער אויסערן מיניסטער שפעט פון טראמפ'ס נייע "עקאנאמישע די-דעי" קאמפיין: "מיר זענען שוין צוגעוואוינט צו סאנקציעס"

דער איראנער אויסערן מיניסטער, אבאס אראגטשי, האט שארף אפגעווארפן פרעזידענט דאנאלד טראמפ'ס נייע געמאלדן "עקאנאמישע די-דעי" קאמפיין קעגן טעהראן, אראפלייגנדיג די אמעריקאנער סטראטעגיע אלס נאך א ווערסיע פון די זעלבע פרעשור טאקטיקן וואס איראן גייט שוין דורך פאר יארן לאנג.

רעדנדיג ביי א צערעמאניע אפצוגעבן כבוד פארן גרינדער פון די איסלאמישע רעפובליק, איאטאלא כאמעיני, האט אראגטשי טענה'ט אז וואשינגטאן קערט זיך פשוט צוריק צו די אלטע באקאנטע עקאנאמישע און פאליטישע פרעשור, נאכדעם וואס זייערע פריערדיגע סטראשונגען פון א מיליטערישע אקציע האבן זיך ארויסגעשטעלט אלס א דורכפאל. זיין מעסידזש איז געווען קלאר: טעהראן גלייבט נישט אז נאך א סאנקציעס קאמפיין וועט צווינגען איראן זיך אונטערצוגעבן.

א "פארניכטנדע עקאנאמישע אפעראציע"

די קאמענטארן קומען נאכדעם וואס טראמפ האט געמאלדן פלענער פאר וואס ער רופט א "מערסט פארניכטנדע עקאנאמישע אפעראציע" קעגן איראן. דער פרעזידענט האט געווארנט לענדער און קאמפאניס וואס שטעלן צו אן עקאנאמישע לעבנס-ליניע פאר טעהראן, אז זיי קענען אויסשטיין גאר ערנסטע קאנסעקווענצן. טראמפ האט אראפגעשטעלט דעם קאמפיין אלס א מעידזשאר עסקאלאציע פון עקאנאמישע פרעשור, געצילט צו איזאלירן איראן און אפשניידן די פינאנציעלע קוועלער וואס שטיצן די איראנער רעגירונג.

דאס לייגט צו נאך א געפארפולע שיכט צום ברייטערן אמעריקע-איראן קאנפליקט, ווען עקאנאמישע קריגערייען ווערן יעצט ארויפגעלייגט אינאיינעם מיט די מיליטערישע און דיפלאמאטישע פרעשור.

"איבערגעקייטע לאקשן"

אראגטשי האט אראפגעריסן די נייע אמעריקאנער איניציאטיוו אלס איבערגעקייטע לאקשן, און באשולדיגט וואשינגטאן אין זיך פארלאזן אויף די זעלבע אלטע בוליאינג טאקטיקן. ער האט געזאגט אז איראן האט שוין מיטגעמאכט שווערע סאנקציעס און אנדערע סארטן פרעשור אין די פארגאנגענהייט, און האט שוין געלערנט ווי אזוי זיך אומצוגיין דערמיט. דער איראנער אויסערן מיניסטער האט צוגעגעבן אז דאס צוריקקערן זיך צו עקאנאמישע מיטלען נאך כסדר'דיגע מיליטערישע סטראשונגען, ווייזט אז אמעריקע האט פשוט נישט קיין עפעקטיווע אפציעס ווי אזוי זיך אן עצה צו געבן מיט טעהראן.

ער האט פארלאנגט אז וואשינגטאן זאל אויפגעבן די כסדר'דיגע פרעשור סטראטעגיעס און אנשטאט דעם גיין צו דירעקטע געשפרעכן מיט איראן. לויט אים, מוז סיי וועלכע ערנסטע דיפלאמאטישע לעזונג זיין באזירט אויף רעספעקט, יושר און כבוד, אנשטאט סטראשונגען און דרוק. זיינע ווערטער טוען אונטערשטרייכן טעהראן'ס לאנגיעריגע פאזיציע אז פארהאנדלונגען קענען נישט זיין סוקסעספול אויב אמעריקע קומט צו איראן פון א פאזיציע פון מאקסימום עקאנאמישע פרעשור.

וואס וועט זיין די ענדע?

די יעצטיגע אויסטוישן לאזן איבער א גרויסע פראגע צייכן איבער די קאנפראנטאציע: צי וועט טראמפ'ס פארשטערקערטע עקאנאמישע קאמפיין באווייזן צו דעליווערן דאס וואס פריערדיגע סאנקציעס האבן נישט באוויזן, אדער וועט איראן נאכאמאל אראפשלינגען דעם דרוק אן טוישן זייער פאזיציע? וואשינגטאן האפט אז דאס דראמאטיש העכערן דעם עקאנאמישן פרייז פאר טעהראן וועט צווינגען א סטראטעגישע טויש, בעת איראנער באאמטע סיגנאליזירן אז זיי פלאנען זיך קעגנצושטעלן ענדערש ווי זיך אונטערצוגעבן. מיט ביידע זייטן וואס זאגן זיך אפ פונעם נאכגעבן, קען די קומענדיגע פאזע פון די עקאנאמישע קאנפראנטאציע זיין פונקט אזוי קריטיש ווי די מיליטערישע און דיפלאמאטישע שלאכטן ביז יעצט.