געמאסקירטע סעטלערס אטאקירן אייראפעאישע דיפלאמאטן אינעם מערב ברעג

א גרופע פון אייראפעאישע דיפלאמאטן און לאקאלע פאלעסטינער זענען אטאקירט געווארן דורך געמאסקירטע מדינת ישראל סעטלערס דעם פארגאנגענעם שבת, אקטאבער 17, נעבן דעם דארף 'טייבע' אינעם מערב ברעג. די דעלעגאציע האט אריינגערעכנט דעם בעלגישן קאנסול גענעראל, פראנצויזישע און פוילישע דיפלאמאטן, ווי אויך קאטוילישע פארשטייער, וועלכע זענען געקומען באטראכטן דעם לאקאלן איילבירטן-שניט.

לויט באריכטן און ווידעא קליפס פון די סצענע, האבן ארום זיבן געמאסקירטע סעטלערס ארומגערינגלט די קארס פון די דיפלאמאטן, געווארפן שטיינער און צעשמעטערט א פענסטער פון א קאר וואס באלאנגט צום בעלגישן קאנסולאט. דער פראנצויזישער מעיאר בערנארד באדאו, וועלכער איז אויך געווען א טייל פון די גרופע, איז אנגעפאלן געווארן און האט שפעטער געזאגט פאר די פרעסע אז די אטאקע צייגט ווי די מדינת ישראל רעגירונג טאלערירט סעטלער געוואלדטאטן. דער אינצידענט קומט בלויז איין טאג נאכדעם וואס א פאטאגראפירער פאר די 'וואשינגטאן פאוסט', היידי לעווין, איז אטאקירט געווארן דורך געמאסקירטע סעטלערס אין אבו פאלאח.

די מדינת ישראל מיליטער האט פארדאמט דעם אינצידענט אלס א "שווערע אקט פון געוואלדטאט", און די פאליציי האט געעפנט אן אויספארשונג, כאטש קיין פארדעכטיגטע זענען נאך דערווייל נישט אידענטיפיצירט אדער ארעסטירט געווארן. די מיליטער האט אנגעוויזן אז קיין זעלנער זענען נישט געווען אויפן ארט ווען די אטאקע האט זיך אנגעהויבן, און אז זיי האבן שפעטער געשאסן אין די לופטן צו צעטרייבן די אנגרייפער. זיי האבן אויך אונטערגעשטראכן אז די באזוך פון די דיפלאמאטן איז נישט געווען קאארדינירט מיט די מיליטער פאראויס.

אויסערן מיניסטער גדעון סער האט אויך שארף פארדאמט די געוואלדטאטן, אבער האט ענליך אנגעוויזן אויף די מאנגל אין קאארדינאציע. אין די זעלבע צייט האט די אפיס פון פרעמיער מיניסטער בנימין נתניהו גערופן צו זיין פארוזיכטיג בעפאר מען ציט מסקנות, ווארנענדיג איבער א מעגליכע קאארדינירטע קאמפיין צו פארשמירן מדינת ישראל דורכאויס דעם איילבירטן-שניט סעזאן, און האט ארויסגעשטעלט צווייפל איבער די פונקטליכע אומשטענדן פון די אטאקע.

דער בעלגישער אויסערן מיניסטער, מאקסים פרעוואט, האט שארף פארדאמט די אטאקע, עס פארבינדן מיט די אלגעמיינע סעטלמענט פאליסיס, און פארשפראכן צו שטיצן סאנקציעס קעגן די פאראנטווארטליכע און די וואס שטיצן זיי. דאס דארף 'טייבע' האט שוין אין די פארגאנגענהייט געליטן פון סעטלער אטאקעס, אריינגערעכנט אן אינצידענט אין יולי 2025 ווען קארס זענען פארברענט געווארן, וואס לייגט נאר צו צום אנגעצויגנקייט ארום די זיכערהייט פונעם היי-יעריגן שניט.