דער רעפובליקאנער קאנגרעסמאן טאמעס מעסי פון קענטאקי האט זיך אויפגעשטעלט אויפן קאנגרעס פלאר מיט א פאדערונג ארויסצושניידן די 3.3 ביליאן דאלאר וואס אמעריקע גיבט יערליך פאר מדינת ישראל אין מיליטערישע הילף. דאס איז געקומען אלס א טייל פון די סטעיט דעפארטמענט בודזשעט ביל פאר יאר 2027.

מעסי האט ארגומענטירט אז עס איז א פשוט'ע ענין פון פינאנציעלע פריאריטעטן. "מיר האבן א חוב פון 39.4 טריליאן דאלאר און מיר דארפן דאס געלט פאר אונזערע אייגענע געברויכן, אריינגערעכנט פארראכטן ראודס און בריקן," האט מעסי געזאגט. ער האט אנגעוויזן אז אמעריקע שיקט מער געלט קיין מדינת ישראל וויפיל זי ספענדט צו העלפן אירע אייגענע היימלאזע וועטעראנען.

כדי ארויסצוברענגען זיין פוינט, האט ער געמאכט אן אינטערעסאנטע חשבון: אויב מען צעטיילט די 3 ביליאן דאלאר צווישן די בערך 3,000 קאונטיס איבער אמעריקע, קומט עס אויס צו א מיליאן דאלאר פער קאונטי. ער האט געטענה'ט אז דאס איז א שיינע סומע וואס מען קען נוצן אינדערהיים אנשטאט עס אוועקצוגעבן אין אויסלאנד.

אומגעווענליכע קאאליציע ביי די שטימען

דער אמענדמענט, וואס איז מיטגעשטיצט געווארן דורך דעם דעמאקראטישן קאנגרעסמאן ראו קאנא פון קאליפארניע, האט געזוכט צו פולשטענדיג אפשטעלן די יערליכע זיכערהייט הילף. אבער ווען עס איז געקומען צו א שטימען דעם 15'טן יולי, איז עס דורכגעפאלן מיט א ריזיגע מערהייט פון 314 קעגן 104.

וואס איז אבער יא געווען אינטערעסאנט איז געווען די צאמשטעל פון די וואס האבן געשטימט דערפאר. מעסי איז געווען דער איינציגסטער רעפובליקאנער צו שטימען 'יא', בשעת אלע אנדערע 215 רעפובליקאנער האבן געשטימט דערקעגן. פון די אנדערע זייט האבן אבער 103 דעמאקראטן געבראכן זייער טראדיציאנאלע שטיצע פאר מדינת ישראל און געשטימט מיטן רעפובליקאנער מעסי.

צווישן די דעמאקראטן וואס האבן געשטימט אפצושטעלן די געלטער זענען געווען פראמינענטע פיגורן ווי די געוועזענע ספיקער נענסי פעלאסי און די דעמאקראטישע 'וויפ' קעטרין קלארק. דער דעמאקראטישער פירער האקים דזשעפריס האט אבער געשטימט דערקעגן, זאגנדיג אז דער ביל איז צו ברייט.

שארפע דעבאטעס צווישן די דעמאקראטן

די דעבאטע אויפן פלאר האט ארויסגעברענגט די טיפע אומאייניגקייטן ביי די דעמאקראטן, וועלכע זענען אונטער דרוק פון פראגרעסיווע וויילער איבער די מלחמה אין עזה. קאנגרעסמאן סטעני האיער פון מערילאנד האט שארף אראפגעריסן דעם אמענדמענט, זאגנדיג אז דאס וועט "געבן מוט פאר די פיינט פון שלום". קאנגרעסמאן ברעד שערמאן האט געווארנט אז די געלטער גייען פאר מיסיל פארטיידיגונג סיסטעמען וואס באשיצן ציווילע בירגער.

קעטרין קלארק האט אבער פארטיידיגט איר שטימע, זאגנדיג אז אמעריקע "טאר נישט געבן קיין בלענק טשעק פאר מיליטערישע הילף פאר סיי וועלכע לאנד וואס האלט זיך נישט צו אמעריקאנער געזעצן און ווערטן."

מעסי בלייבט אן איזאלירטע שטימע

מעסי, וועלכער איז שוין לאנג באקאנט אלס א שארפער קעגנער צו סיי וועלכע אויסערן-הילף, האט אנערקענט זיין דורכפאל, אבער האט אנגעוויזן אויף די 104 שטימען אלס א צייכן אז די ווינטן רוקן זיך. "כאטש מיין אמענדמענט אפצושטעלן די 3.3 ביליאן דאלאר הילף איז נישט דורכגעגאנגען, האבן 104 קאנגרעס מיטגלידער געשטימט דערפאר," האט ער געשריבן אויף סאשעל מידיא, צולייגנדיג אז די פובליק מיינונג הייבט זיך אן צו טוישן.

דער שטימען קומט אין א צייט וואס מעסי האט לעצטנס פארלוירן זיין רעפובליקאנער פריימערי נאכדעם וואס פרעזידענט טראמפ האט אינדארסירט זיין קעגנער. פרא-מדינת ישראל גרופעס נוצן דאס אים אראפצומאלן אלס אן איזאלירטע שטימע וואס רעפרעזענטירט נישט די אלגעמיינע רעפובליקאנער פארטיי.